وعدى باقي اليوم من غير أحداث. وجاء الصبح وصحيت فريدة كالعادة وصليت وقرأت وردها وحضرت الفطار لأخواتها، وأخدت جزء بسيط من المبلغ وراحت المستشفى تاخد رأي الدكتور ممدوح.
وصلت فريدة المستشفى ودخلت على مكان تجمعهم، زميلها: صباح الخير على الناس السهرانة.
أمل صديقتها وأخت خطيبها: صباح النور.
فريدة: أخبار النبطشية إيه؟
أمل: تمام، مكنش فيه معكنن عليه غير وجود البت دينا.
فريدة: انتي مالك بيها؟
أمل: معرفش، بس مش بحبها. المهم شكلك مبسوط كده ليه؟ يكونش السبب الواد أخويا؟
فريدة وهي بتضحك: لا، هحكيلك. وحكت فريدة كل شيء حصل معاها لأمل: إيه رأيك بقى؟
أمل وهي غير مستوعبة: بقى كل ده حصل فعلًا؟ البني آدم مش بيتعز بالساهل.
فريدة: المهم أنا هروح دلوقتي لدكتور ممدوح أبلغه بقراري من موضوع السفر، وكمان أسأله على حوار التبرع ده.
أمل: ماشي يا جميل، وأنا هغير هدومي وأمشي أحسن خلاص مش شايفة.
لم ياخدوا بالهم من اللي كان بيسمع كلامهم واستخبى أول ما فريدة خرجت علشان متشوفهاش.
دينا بنبرة غل: أنا مش عارفه فريدة دي إيه؟ كل ده ليها؟ وتأتي واحدة صديقتها أخرى: مالك يا دينا بتكلمي نفسك على الصبح؟
دينا: هه مفيش، المهم يا ختي يلا استلمي النبطشية بقى عايزة أمشي.
أما عند فريدة وصلت لمكتب الدكتور ممدوح وخبطت وأذن ليها بالدخول.
فريدة: صباح الخير يا دكتور.
الدكتور ممدوح: صباح الخير، تعالى يا فريدة، طول عمرك مواعيدك مظبوطة.
فريدة بابتسامة بسيطة: تلميذة حضرتك.
الدكتور ممدوح: وأنا ليه الشرف. المهم أخبارك إيه؟
فريدة: تمام.
الدكتور ممدوح وهو بيشير ليها بالجلوس: اقعدي، الناس لسه قافلين معايا ومتمسكين بيكي، إيه رأيك؟
فريدة: بصراحة أنا طبعًا مقدرش أرفض لحضرتك طلب، بس ظروفي متسمحش، وبعدين ربنا فرجها من ناحية تانية. كنت جاية آخد رأيك حضرتك في حاجة.
الدكتور ممدوح باستفهام: أوعي تكوني ناوية تسيبي الشغل وهتتجوزي وتعقدي في البيت.
فريدة بابتسامة: لا طبعًا، الشغل ده كل حياتي. وحكت ليه كل حاجة، وكمان الجزء اللي هيتبرعوا بيه والفلوس اللي معاها.
دكتور ممدوح: طول عمري نظرتي ورأيي فيك مش هيتغيروا، انت أنبل شخصية ممكن الواحد يقابلها، وصدقيني يا فريدة ربنا هيجزيكي خير.
فريدة: متشكرة. وطلعت الفلوس واديتها لدكتور ممدوح لأن هو أكتر واحد هيعرف يتصرف، واستأذنت ومشيت.
وأثناء خروج دينا من المستشفى شافت خطيب فريدة، وهي أصلًا معجبة بيه، وزاد حقدها على فريدة لما خطبها. وشورتلوا وسلمت عليه وعرفتوا بنفسها، وحكيت ليه على اللي سمعته ما بين فريدة وأمل أخته، ولاحظت تغير وشه اللي اسود من شدة غيظه من فريدة، واستأذن منها ومشى. وبعد ما مشي ضحكت بشر: أبقى قابليني يا فريدة.
ودخل خطيبها المستشفى وشافها واقفة مع حد من زميلاتها، أول ما شافته جاءت عليه وهي مبتسمة: معقول وحشتك على الصبح كده؟
خطيبها بضيق: طب بس ممكن نتكلم شويه؟
فريدة حست من نبرة صوته إن في حاجة مش مظبوطة: حاضر دلوقتي.
خطيبها: آه ينفع؟
فريدة: حاضر، ثواني بس هستأذن وأغير هدومي.
استأذنت فريدة وخرجت معه وركبت تاكسي دون أي كلام منه لحد ما وصل كافتيريا على النيل، نزلوا ودخلوا وقعدوا وطلبوا عصير.
فريدة بقلق: في إيه؟ مالك؟
خطيبها: مش عارف مالي.
فريدة: لا.
خطيبها: انت فعلًا رفضتي موضوع السفر نهائيًا؟
فريدة: آه، بلغت بيه الدكتور ممدوح النهاردة، وأظن الموضوع ده احنا نهاينه.
خطيبها: وطب موضوع فلوس عمك؟
فريدة بدهشة، فهي لم تخبر بيه أحد سواء صديقتها أمل والدكتور ممدوح، فبرغم من أن أمل أخته لكن هي تثق فيها، أما الدكتور ممدوح مستحيل، ممكن يكون حد من أخواتها؟ بس لا طبعًا. فاقت من ده على صوته: إيه؟ روحي فين؟
فريدة: معاك، بس ممكن أعرف مين اللي قالك؟
خطيبها: مش مهم، المهم إني عرفت، وحضرتك كنت ناوية تخبي عليه.
فريدة: لا طبعًا، بس كل الحكاية إن الموضوع جه بسرعة، وكنت ناوية لما أشوفك أحكيلك.
خطيبها: اتفضل احكي.
فريدة حكت ليه كل حاجة بالتفصيل: بس يا سيدي، دي كل الحكاية. طبعًا ما عدا ضربها لأختها.
خطيبها: خلصتي؟
فريدة: آه.
خطيبها: انت مش شايفة نفسك انانية؟
فريدة: لا، ليه؟
خطيبها: علشان بتفكري في مصلحة كل الناس ما عدا مصلحتنا. رفضتي فرصة سفرك مع إننا كنا محتاجينها في بداية حياتنا، وبعدين فلوس عمك اللي ناوية تتبرعي بجزء منها، وكمان تشاركي أخواتك بدل ما نعمل مشروع نقف بيه على رجلنا. انت إيه يا شخة؟ دور المثالية اللي انت عايشة فيه هتفوقى منه امتى؟
فريدة مصدومة من كلامه: انت إيه اللي بتقوله ده؟
خطيبها: دي الحقيقة، انتي مش ناوية تبوصى لمصلحتنا، ودي آخر فرصة هديهالك. ادامك خيارين: ياتوافقي على موضوع السفر، ياما تشيلي فكرة التبرع ده من دماغك وتاخدي نصيبك ونفتح بيه مشروع، يااما كل واحد يروح في حاله. وبعد ما خلص كلامه سبها ومشي.
فريدة فضلت قاعدة شوية مصدومة من كلامه، إزاي قدر يقول كل الكلام ده؟ مستحيل يكون هو ده الشخص اللي ممكن أكمل معه. بس أنا لازم آخد رأي حد.
مشيت فريدة كلمت زميلة ليها تستأذن ليها من الدكتور ممدوح إنها تاخد إجازة النهاردة، ووافق، ورجعت على البيت.
لقيت أخواتها لسه منزلوش، استغربوا من وجودها في الوقت ده في البيت، وقبل ما يسألوها كانت توحيدة بتخبط عليها لأنها شافت فريدة رجعت، وكلهم سألوه في نفس الوقت.
فريدة وهي بتحاول تهرب من عيونهم: مفيش، تعبت شوية فقولت أرجع أرتاح.
توحيدة وقد فهمت إن فريدة مش هتتكلم ادام أخواتها: خلاص يا حبيبتي، ارتاحي انت.
ودخلت فريدة أوضتها.
توحيدة: يلا يا بشمهندسين على كليتكم.
علا: طب عايزة تزحلقيني علشان تستفردي بيها؟ ماشي يا توحة.
توحيدة وهي بتضحك: يا جازي شطانك يا علا بقنا يا بت كده، ماشي يلا.
بعد ما اتأكدت إنهم مشيوا خبطت توحيدة ودخلت لقت فريدة بتعيط: مالك يا بنتي؟
فريدة: تعبانة يا خالتي، مش عارفة الدنيا عاملة معايا كده ليه، تعبت من الدنيا.
توحيدة: وحدي الله.
فريدة: لا إله إلا الله.
توحيدة: احكي إيه اللي حصل.
فريدة حكت ليها كل حاجة حصلت معها ومع خطيبها، وكملت بدموع: وهو أنا كده انانية يا خالتي؟
توحيدة وهي صعبان عليها فريدة: لا يا حبيبتي، هو اللي أناني وميستهلش ضفرك.
فريدة: بيخيرني بينه وبين أخواتي، وناسي إن هما الاتنين غلاوتهم واحدة. أعمل يا خالتي؟
توحيدة: عايزة رأيي؟
فريدة: أومال أنا حكتلك ليه؟
توحيدة: فكري تاني، دي حياتك ومستقبلك.
فريدة: حاضر.
توحيدة: هقوم أمشي بقى وسيبك تستريحي.
فاقت فريدة من ذكرياتها على صوت زينات.
زينات: وأنا كمان بقولك قومي عشان تستريحي، وبكرة من الصبح بدري هبقا مستنياكي تحكيلي إيه اللي حصل بعدين.
فريدة بحزن: بس أنا…
زينات: اسمعي الكلام، بكرة هستناكي، وكمان أنا كمان تعبت من كتر القعدة.
