علا وهي تمثل الزعل: أنا قصدك في حاجة يا خالتي.
توحيدة: تعالى ادخلي يا بنتي، هنتكلم على الباب.
دخلت علا وحكت لتوحيدة كل حاجة من ساعة عمها ما جاء ومشى، وموضوع الفلوس وغضب فريدة منهم: إيه رأيك يا خالتي؟
توحيدة: معلش يا علا، انتي لازم تعزريها، فريدة اللي شافته كتير.
علا بتمثيل: ما أنا عارفة، وربنا بعت الفلوس لينا علشان يعوضنا، وخصوصًا فريدة علشان تتجوز وتعيش حياتها، واحنا كمان نقف على رجلنا، احنا غلطانين كده.
توحيدة: لا، ازاي كده؟ عندك حق، أنا هروح معاكي.
وبعد شوية دخلت توحيدة وعلا الشقة.
توحيدة راحت ناحية أوضة فريدة وخبطت: افتحي يا فريدة يا بنتي، أنا خالتك توحيدة.
فتحت فريدة الباب لتوحيدة: اتفضلي يا خالتي.
توحيدة: مالك يا بنتي؟ فيكي إيه؟
حينما سمعت فريدة كلام توحيدة رمت نفسها في حضنها وانفجرت في العياط: جاي بعد السنين دي كلها بيقول سامحوني، وعايز يشتري مسامحتنا ليه بفلوس؟
توحيدة وهي بتطبطب عليها: اهدي يا بنتي، ده كله قدر ومكتوب، وبعدين ده حقكم وحق أبوكم الله يرحمه. انتي ليه زعلانة من أخواتك ومش عايزهم ياخدوا الفلوس؟
فريدة: أنا أبدًا، أنا زعلت إنهم همهم الفلوس ونسوا أمنا وأبونا وحياتنا، اللي لولاكم انتي والحاج عبد الله كان زمانا ضاعنا.
توحيدة: متقوليش كده، يعلم ربنا إن معزتك انتي وأخواتك كأنكم ولادي اللي مخلفتهم.
فريدة: ربنا ما يحرمنا منكم.
توحيدة: وبعدين الفلوس دي جات في وقتها، تقدري تقوليلي كنت هتعملي إيه لما أخواتك يخلصوا؟ وبعدين تجهزي لجوازك ازاي وأخواتك؟ كنتي هتعملي معاهم إيه؟ مش يمكن ربك ليه حكمة في كده؟
فريدة بصتلها بصه معناها عندك حق.
توحيدة: أنا عارفة إنك طول عمرك عاقلة وبتفكري في مصلحة أخواتك. وبعدين قومي كده اغسلي وشك وشوفي أخواتك، دي علا حبيبة عيني جاتلي ميتة نفسها من العياط، وعلاء قاعد بره حزين عليكي. يلا يا بنتي كملي رسالتك ووعدك للمرحومة أمك علشان تكون مستريحة.
فريدة اقتنعت بكلام توحيدة وقامت خرجت معها، وأول ما شافوها أخواتها جريوا عليها وحضنوها.
علاء: فريدة، خلاص مش عايزين الفلوس دي اللي هتخليكي تزعلي مننا.
علا: عندك حق، أنا بكرة هاخد الفلوس وهروح لعمي وأرجعهم، المهم إن فيري حبيبتي متزعلش مننا.
فريدة: لا، أنا خلاص اقتنعت إننا ناخد الفلوس، بس في شرط.
وهنا ابتسمت علا ابتسامة نصر على نجاح خططها.
ظلت فريدة تحكي لزينات باقي قصتها ومشوار كفاحها في تربية أخواتها.
وافقت فريدة على إنها تأخذ الفلوس من عمها لكن بشرط.
علا: شرط إيه يا فيري؟
فريدة وهي تجلس على كرسي وتشير لهم ولتوحيدة بالجلوس: شرطي إننا ناخد جزء من الفلوس دي ونتبرع بيه لمعهد القلب علشان الناس اللي متقدرش تتعالج تروح وتاخد العلاج. وكملت ببكاء: مش عايزة حد يتحرم من أعز الناس عنده علشان الفلوس. نعم إنها فريدة، هذه الشابة الجميلة الشكل والقلب، لكن موجودة في زمن صعب.
وقفت علا مرة واحدة: بس ده حرام، ده حقنا احنا، ليه عايزنا نتبرع بيه؟ ووجهت كلامها لعلاء ولتوحيدة: متتكلموا معايا، عجبك عمايل أختك؟ وإنتي يا خالتي، ده أنا لسه بقولك الفلوس دي جات في وقتها وتقولي تتبرع؟ الظاهر إن فريدة خلاص اتجننت.
وقبل ما تكمل كلامها كانت فريدة بتضربها بالقلم: كملي يا أختي الغالية، اتجننت صح؟ علشان عايزة أعمل صدقة جارية على روح أمك وأبوك؟ أبقى اتجننت؟ اتكلم يا بشمهندس، وانتي يا خالتي، أنا كده مجنونة؟ ودخلت في نوبة بكاء.
أما علا مازالت مصدومة من رد فعل أختها ودخلت جري على أوضتها.
فريدة فضلت تبكي في حضن توحيدة: خلاص يا فريدة.
فريدة من بين دموعها: أنا ضربت علا، أنا ازاي عملت كده؟
علاء وهو في حالة ذهول: ضربتي علا؟ دي أول مرة تعمليها، دي حتى لما كانت بتغلط عمرك ما عملتيها.. ليه يا فريدة؟
توحيدة وهي بتغمز ليه: خلاص يا علاء، روح لأختك صالحها، وأنا مع فريدة هنا.
دخل علاء عند علا وجدها تضع يديها فوق خدها وفي حالة زهول: علاء، أنا عارف إن فريدة غلطت.. وانتي كمان غلطتي لما قولتي عليها اتجننت.. بس دي فريدة اللي طول حياتها إحنا أهم حاجة فيها.
علا: لا، أنا اللي غلطت يا علاء، فريدة عندها حق، أنا هخرج أتأسفلها.
علاء غير مصدق كلامها: ازاي يعني إنتي وافقتي على موضوع التبرع؟
علا بنظرة خبيثة: آه، بس مش أنا اللي هتبرع، فريدة.
علاء: أنا مش فاهم حاجة.
علا: مش مهم تفهم دلوقتي، بعدين.
وخرجت علا ورسمت نظرة الحزن على وشها: فريدة، أنا آسفة.
فريدة أول ما شافتها جريت عليها تبوس في وشها: أنا اللي آسفة يا حبيبتي.
علا: لا، أنا بس إنتي مفهمتيش قصدي، أنا كنت ناوية أعمل كده بس بعدين، مش دلوقتي.
فريدة بعد ما فهمت: ازاي؟
علا مسكة إيد فريدة: تعالي نقعد وأنا هحكيلك.
توحيدة: طب استأذن أنا بقى.
علا: لا يا خالتي، استني علشان تبقى شاهدة على كلامي.. بس يا ستي، أنا وعلاء كنا ناوين نشارك اتنين من زمايلنا في مكتب ديكور، وكنا محتاجين فلوس، فلما الفلوس جات مش محتاجين نشارك حد، إحنا هنفتح المكتب، وكنت ناوية من أرباحه إننا نعمل جزء منها يروح لمعاهد القلب في كل مكان، لكن انتي بكده هتعجزيها معانا بأسلوب استعطاف، بس طالما انتي مصممة يبقى خلاص، اللي تشوفيه.
فريدة بفرحة: بجد انتي ناوية تعملي كده؟
علا: آه، واسألي علاء. وبصت ناحية علاء نظرة معناها إنك توافق.
فريدة: بجد يا علاء؟
علاء وقد فهم دماغ أخته: آه يا فريدة.
فريدة: خلاص طالما كده أنا موافقة، بس هاخد جزء صغير ونتبرع بيه، وبعد كده يبقى زي ما قولت.
علا وقد أحست بالنصر: اللي تشوفيه. وحضنوا بعض هما التلاتة.
توحيدة بدموع: ربنا ما يحرمكم من بعض.
دخلت علا أوضتها ودخل وراها علاء: أنتي دماغك دي معمولة من إيه؟ جات في دماغك الفكرة دي ازاي؟
علا بتفاخر: يا بني دماغي دي عالية، وبعدين لو كنت وقفت في وش فريدة كنا هنخسر، فحبيت ألعبها، وبعدين أنا ما كذبتش إلا في حاجة واحدة بس.
علاء: إيه هي؟
علا: في إننا هنتبرع بجزء من الأرباح، هي مفيش إننا هتبقى فريدة بس، ومن غير ما تعرف.
علاء: أفهمها ازاي؟
علا: هي طبعًا واثقة فينا، فهقلل شوية في الأرباح ونقولها هي دي، وهنطلع جزء اللي اتفقنا عليه، ولا من شاف ولا من دري. كانت تقول هذه الكلمات وهي بتتمشى في الأوضة رايحة جايه.
علاء وهو بيضربها في دماغها: أنتي إيه شر؟
علا: لا يا حبيبي، أنا واقعية، بس ها، معايا ولا عليا؟
علاء: طبعًا معاكي.
