ما بعد الألم
كعادته الصباحية يمارس تمارينه الرياضية. عيناه ممتلئة برغبة قوية في استرداد الحق، ولن يهدأ له بال إلا باسترداد حقّه من هؤلاء الذين حرموه من والده، ولم يحرموه فقط بل حرموا زوجة والده وولديها من حنان ذلك الأب. وكلما مر يوم وهؤلاء المسؤولون بعيدون عن سيطرته يزداد ضيقه وغضبه تجاههم، فقد سلبوا منه أعز شخص وعليهم دفع ثمن ذلك غاليًا.
بعد فترة طويلة من الركض يدلف إلى الفيلا التي يقيم بها ثم صعد إلى غرفته ثم دلف إلى الحمام يغتسل، وبعد مدة خرج وهو يلف منشفة حول جزعه السفلى.
توجه لغرفة الملابس وقام بإخراج ملابسه وقام بارتدائها ثم وقف أمام المرآة وقام بتسريح شعره ونثر عطره المفضل، وبعد ذلك نزل إلى الأسفل.
وجد الجميع يتناولون الإفطار فألقى عليهم تحية الصباح ثم جلس يتناول حصته من وجبة الإفطار.
أمينة: صباح الخير يا حبيبي. اقعد افطر قبل ما تمشى.
مراد: حاضر يا ماما.
ثم نظر إلى الطفلة ذات العام الواحد القابعة في أحضان والدتها. ابتسم لها بحنان قائلًا: وبيبة حبيبة خالها عاملة إيه النهاردة؟
تسنيم: كويسة يا خالو. ربنا يخليك يا حبيبي. خفت بعد ما إدناها الحقنة بس ما نامتش طول الليل وهي تصرخ، بس الحمد لله دلوقتي زي الفل.
أمينة: كلمي خالو يا بيبة.
حبيبة بطفولة: با… بابا.
معتز: إيه يا حبيبة؟ بابا تعالى. حملها معتز وأخذ يداعبها وهي تبتسم له بسعادة.
مراد: بقى كده يا حبيبة؟ ماشي، أما أرجعلك.
فريد: هتخلص شغل بدري النهاردة يا مراد علشان تحضر افتتاح الشركة الجديدة.
مراد: والله يا عمي مش عارف هخلص امتى، بس مش مهم وجودي، كفاية حضرتك يا عمي ومعتز كمان.
فريد: لا هيفرق. وجودك مهم زيك زينا بالظبط.
مراد: حاضر يا عمي، هحاول أبدل النبطشية مع أي حد من صحابي واجي. عن إذنكم مضطر أمشي دلوقتي.
أمينة بتماسك: خلى بالك من نفسك يا عمري. لا إله إلا الله.
مراد: محمد رسول الله يا أمى. سلام.
خرج مراد من الفيلا وصعد إلى سيارته منطلقًا إلى عمله.
بالداخل جلست أمينة بحزن ودموع، فهي كل يوم عند خروج مراد تضع يدها على قلبها بقلق حتى يعود إليها سالمًا. فهي تخاف من فقدانه كما فقدت زوجها العزيز على يد هؤلاء المخالفين الذين انعدمت ضمائرهم.
فاطمة: وبعدين معاكى يا أمينة؟ كل يوم كدة يا ستى، ما هو كويس أهو. قصدي إنه ربنا حاميه. متقلقيش.
أمينة: مش بإيدى يا فاطمة، صدقيني مش بإيدى. أنا بخاف عليه لا ما يرجعش زي أبوه.
زينة مربتة على ظهرها بحنان: متقلقيش يا مرات عمى، إن شاء الله هيكون كويس، مراد قدها وقدود.
أمينة: يا رب يا بنتى يا رب.
فريد: يلا يا معتز علشان نمشى إحنا كمان.
معتز: حاضر يا بابا. خدي يا تسنيم بيبة هانم.
تسنيم: تعالى يا حبيبة، تعالى يا روح ماما، خلى بابا يروح الشغل.
معتز مقبلًا تسنيم على جبينها قائلًا: خدوا بالكو من نفسكم. سلام يا مرات عمى، سلام يا زينة.
الجميع: سلام.
بعد رحيل فريد ومعتز.
زينة: وأنا كمان يا مامى رايحة النادى مع أصحابى.
فاطمة: ماشى بس ما تتأخريش.
زينة: حاضر يا ماما، يلا سلام.
وبعد أن رحلت.
فاطمة: تعالى يا أمينة نقعد برة في الجنينة الخضرا، هتريح أعصابك.
أمينة: ماشى يا فاطمة. تسنيم وأنا هروح أغير للعفريتة دي، أصلها عملتها وغدرت بيا البرنسيس.
في مكان بعيد تمامًا في أحد المناطق الشعبية في أحد الأحياء، وبالتحديد في شقة متهالكة وفي أحد الغرف، على الأرضية القاسية وذلك الفراش المتهالك، تستيقظ تلك الجميلة النحيلة ذات الوجه الذابل وتفرك عينيها بطفولية ثم فتحت عينيها فظهر ذلك العشب الأخضر.
جلست نصف جلسة وأخذت تتثاءب بتعب قائلة: آه عيني عليكى يا ورد وعلى شبابك، آه يا ضهرى يا أنا. منك لله يا مرات خالي، منك لله، مش كنتي تجيبيلى سرير أنام عليه بدل نومة الأرض اللي تقصف الضهر دي.
ثم مدت يدها تحت الوسادة وسحبت من تحتها مجلة ونظرت للشخص الذي يزين الغلاف بوسامته المعتادة. أخذت تتأمله بشغف وسعادة، وما لبثت أن تنهدت بحزن وهي تضم المجلة إلى صدرها قائلة: إمتى بقى هاتيجى تاخدنى يا سليم من هنا؟ أنا مستنياك من زمان أوى، بس إنت مش راضى تيجى زي ما بابا قالى زمان، الله يرحمه.
ثم امتلأت عينيها بالدموع وقالت بصوت مخنوق من البكاء تشكو حالها إليه وكأنه أمامها: خالي بيضربنى أوى وكمان، وكمان مرات خالي. تعالى خدنى والنبي.
وضعت المجلة بسرعة تحت الوسادة ومسحت دموعها بسرعة حينما تعالت الطرقات على باب الغرفة، فقامت من مكانها وقامت بفتح الباب، فدلفت سميحة ابنة خالها التي قالت: نفسى أعرف بتقفلى على نفسك ليه بالمفتاح؟ يكونش هتتخطفى من وسطينا؟
ورد بإرتباك: ها، لا أبدًا. أصل، أصل، بخاف من خالي ليضربنى أو مرات خالي.
سميحة بإشفاق: يا حبيبتى يا ورد، سامحينى، مش بإيدى حاجة أعملها والله.
ثم قالت بمرح لتغير الموضوع: وبعدين يا جولييت فيكى وفى سى روميو بتاعك دة. مش هتبطلى أبدًا بحلقة في المجلة في صورته دى؟ آه لو منيرة عرفت، آه.
ورد بفزع: لا لا والنبى، بلاش دى هتدينى علقة موت. سيبك منها، أنا كنت عاوزة أشكرك علشان أدتينى اللاب توب بتاعك دة أسمع عليه دروس الفقه. حلوة أوى أوى يا سميحة.
سميحة: ولا يهمك يا ستى، أى خدمة في أى وقت تحتاجيه قوليلى وأنا هبقى أشغلك الفيديوهات اللى إنتي عاوزاها.
ورد بحزن: يا بختك يا سميحة بتروحى الجامعة، هي حلوة؟
سميحة بإشفاق: آه يا حبيبتى حلوة. ثم أضافت بمرح: بس المذاكرة تخليكى تلعنى اليوم اللى شوفتى فيه الجامعة. يلا يا ستى دلوقتى قومى علشان تفطرى.
ورد: حاضر يا سميحة.
شهقت بخوف حينما دلفت منيرة إلى الغرفة بوجهها الغاضب صائحة بسخرية: الله الله والله عال. لا مينفعش كدة، إستنى أما أروح أجيبلك فطار ودى تيجى.
ثم صاحت بغضب: قومى يا روح أمك شوفى وراكى إيه وإعمليه بدل ما أرنك علقة ع الصبح كدة.
ورد: حححاضر، حاضر يا مرات خالى، انا قايمة أهو علطول.
قالت ذلك ثم خرجت بسرعة إلى الخارج تقوم بأداء المهام المنزلية.
سميحة: حرام عليكى يا اما، ما يصحش كدة، دى البت بتبقى زى الفار المبلول، يا أما براحة عليها.
منيرة: بقولك إيه يا بنت بطنى، لمى الدور على الصبح وروحى شوفى مذاكرتك على ما أروح أشوف مقصوفة الرقبة بتهبب إيه. وقعة أمها سودة لو غلطت في حاجة المرة دى. ثم تركتها ورحلت.
