فتأففت سميحة بضيق قائلة: ربنا يهديكى يا أما وتخفى ع البت شوية.
بالخارج كانت ورد في المطبخ تقوم بغسيل الأطباق فدلفت زوجة خالها تصيح: إخلصى، بلاش لكاعة، علشان تمسحى الشقة بعد ما تخلصى المطبخ.
ورد: بس انا مسحتها إمبارح، حرام عليكى يا مرات خالى.
منيرة: حرمت عليكى عشتك، بت قليلة الأدب صحيح. طيب والله لما ييجى خالك لأقوله.
ورد بخوف: لا والنبى، خلاص حرمت. حاضر همسح الشقة، بس بلاش خالى وحياة سميحة عندك.
منيرة: طيب يلا إنجرى شوفى اللي وراكى، أنا رايحة لخالتك عواطف، ولو جيت وملقتش حاجة إتعملت قولى على نفسك يا رحمن يا رحيم.
ورد: حاضر يا مرات خالى، بس، بس.
منيرة: إيه هتبسبسى كتير؟ إخلصى، أنا مش فاضيالك.
ورد بخوف وترقب: أصل أنا جعانة يا مرات خالى.
منيرة: أهو عندك الجبنة متلقحة جوة على البوتاجاز.
ورد: ماشى يا مرات خالى، شكرا.
قالت ذلك ثم خرجت من المطبخ.
ورد: جبنة جبنة، أحسن من بلاش، الحمد لله، غيرى مش لاقيها. تعالى يا ست جبنة أما أكلك هم النم.
قامت ورد بإحضار الخبز وأخذت تأكل بنهم شديد، فهي لم تتناول وجبة العشاء البارحة بسبب عقاب زوجة خالها. بعد تناولها للطعام ذهبت لمتابعة عملها.
في فيلا حامد الداغر وفي جناح عصري يخرج من الحمام مرتديًا بورنس الحمام ثم يدلف إلى غرفة الملابس وانتقى منها ما يرتديه، وبعد فترة خرج مرتديًا بذلة رمادية ورش عطره ولبس ساعته وألقى نظرة أخيرة على مظهره ثم بعد ذلك نزل للأسفل.
وجد الجميع يتناولون وجبة الإفطار فجلس ببرود يتناول الطعام.
حامد: إتصلت بالشركة بتاعة الإعلانات اللى هتسوقلى الدعايا بتاعة الإنتخابات؟
سليم: أيوة يا بابا، ما تقلقش، كله تمام.
حامد: طيب كويس، لاني مش هسمح بغلطة تحصل، منافسينى ما هيصدقوا. عن اذنكوا أنا رايح أشوف اللي ورايا.
قال ذلك ثم غادر خارجًا وصعد إلى سيارته متجهًا إلى الشركة.
عند ندى امتلأت عينيها بالدموع جراء كلمات مصطفى، فهو دائمًا لا يراعي مشاعرها أمام الجميع أو حتى بينهم، فهي في نظره عبارة عن صفقة أراد والده إكمالها بالزواج منها، ومنذ زواجه منها يتعامل معها بآلية شديدة، فهو لا يعرف شيئًا عن المشاعر فيصب جميع اهتمامه على العمل.
هذا ما نشأوا عليه جراء تربية والدهم.
صفاء بإشفاق وبصوت منخفض: معلش يا حبيبتى.
ندى وهي تحيد عيناها بعيدًا حتى لا تظهر دموعها العالقة فيها: لا عادى يا ماما، ما تخديش في بالك.
ثم حملت طفلها ذو العامين قائلة: هروح أغير لسليم.
صفاء: ماشى يا حبيبتى.
أما هي صعدت بسرعة للأعلى لغرفتها، وهنا أطلقت السراح لدموعها، فهي اتخذت من ابنها حيلة لكي تتوارى منهم ولا تريهم معاناتها.
بالأسفل انتهى سليم من طعامه هو ووالده.
حامد: يلا يا سليم بينا على الشركة.
سليم: ماشى يا بابا. سلام يا ست الكل.
صفاء: سلام يا حبيبى، في رعاية الله.
في مركز الشرطة يدلف مراد إلى الداخل ويتوجه لمكتبه لمتابعة مستجدات القضية.
يدلف صديقه عمر إلى الداخل ويلقي عليه التحية.
عمر: إزيك يا صاحبي؟ عامل ايه النهاردة؟
مراد: الحمد لله. وأخبار الست والدتك إيه؟
عمر: لا كويسة الحمد لله. تسلم يا شق.
مراد بجدية: ها يا عمر، الرجالة اللى مكلفينهم بمراقبة المكان وصلوا لحاجة ولا لسة؟
عمر: لا للأسف، لسة. من وقت آخر مواجهة ليهم مع الشرطة وهما مختفيين عن العين، حتى نشاطهم قل، مش زى الأول.
مراد بغل: بس يقعوا تحت أيدى، والله ما هرحمهم. هما ليهم قرايب بيترددوا عليهم؟
عمر: لا، قرايبهم محدش منهم يعرف حاجة عنهم. إنت ناسى المداهمة اللى إنت عملتها آخر مرة؟
مراد: بس لسة معترناش في عنوان مراته، دى الوحيدة اللى محدش دور عندها. تقب وتغطس في الدرا يا عمر وتجيبلى عنوانها. أنا مش عاوز أى حد من الداخلية يعرف بأى حاجة أنا بعملها.
عمر: طيب إنت شايف إن كدة صح؟
مراد: مليش دعوة باللى يصح وما يصحش. لو الداخلية وصلت لهم قبلى يبقى كل اللى بعمله دة راح فشنك. أنا عاوز أنا اللى أقبض عليهم وأقطع جسمهم حتة حتة قدامهم وهما حيين علشان يدوقوا الكأس اللى دوقوهولى.
عمر: ربنا معاك يا صاحبى، أنا خايف عليك من المسائلة القانونية مش أكتر.
مراد: متقلقش، انا مستعد لأى مسائلة قانونية، بس أخد بتارى الأول وأبرد نارى منهم.
عمر: وأنا معاك يا صاحبى لحد النهاية.
مراد: تسلملى يا عمر.
عمر: بس مقولتليش فين الواد سليم؟ مش باين اليومين دول.
مراد: أبدًا يا سيدى، كان في لندن ورجع في صفقة تبعهم في الشغل.
عمر: ابن الأيه، تلاقيه زاط في الزيطة هناك، ابن المحظوظة. خلينا إحنا هنا بوزنا في بوز بعض كدة.
مراد بضحك: والله العظيم إنت فظيع. قوم روح شوف وراك إيه، قوم.
عمر: ماشى يا صاحبى، اشوفك بعدين، سلام دلوقتى.
مراد: سلام يا اخويا، وخد الباب في إيدك.
عمر: ماشى يا عمنا.
في أحد الأحياء الشعبية في أحد الشقق البسيطة تجلس لمار على كرسي وبيدها مقص تقوم بقص تصميمها الجديد.
لمار: الحمد لله، بحق شوية الفساتين دول على المعاش بتاع أمى هيمشينى لآخر الشهر وهيكفى إن شاء الله.
تركت المقص من يدها بفزع حينما رن جرس الباب فاتجهت بحذر ناحية الباب.
لمار بصوت مهتز: مين؟
عواطف: إفتحى يا دلعدى، دة أنا مرات أبوكى.
لمار: عاوزة إيه؟
عواطف بإستنكار: شوفى البت بجحة إزاى. يا بت إفتحى، هو أنا هاكلك؟
تأففت لمار بضيق وقامت بفتح الباب فدلفت الأخرى على الفور.
لمار: أهلا بيكى يا مرات أبويا، إيه اللى فكرك بيا؟
عواطف: أبوكى يا أختى اللى قالى أشقر عليكى، الحق عليا.
لمار: شكرًا لتعبك، تحبى تشربى حاجة؟
عواطف: لا يا أختى، أنا همشى دلوقتى، بس جاية أخد الأمانة اللى أبوكى سابها هنا.
لمار بإستغراب: أمانة! أمانة إيه دى؟
عواطف وهي تتجه إلى الداخل ثم بعد ذلك تعود وبيدها كيس أسود ملفوف.
لمار: إيه دة؟ وبعدين أبويا مقليش حاجة عنها.
عواطف: دى حاجة تبع الشغل بتاعه يا عنيا، وخباها هنا علشان دة مكان آمن محدش يقدر يتوقعه.
لمار: ليه؟ هو الكيس دة فيه إيه؟
عواطف: هيكون فيه إيه؟ هروين يا عنيا.
لمار بصدمة: إيه؟ بتقولى هروين يا مصيبتى. وحاطينه عندى ليه؟ عاوزين تلبسونى مصيبة، حرام عليكوا، ربنا ينتقم منكم، عملتلكم إيه أنا؟ سيبتلكم حياتكم غير المناسبة دى وبعدت عنكم وعايشة بما يرضى ربنا، وانتوا برضوا جايبين الذنب دة ومخلينه هنا معايا. أعمل إيه علشان أريحكم منى؟ ها؟ أعملكم إيه؟
عواطف: بت إنتي إتلمى بدل ما ألمك. عاجبك تعيشى عشيتنا؟ أهلا وسهلا. مش عاجبك؟ أبوكى يجيب رقبتك علطول، إحنا مش ناقصين تعطيل مصالح.
لمار بصراخ: إطلعى برة. إطلعى برة. حرام عليكوا حرام. مش عاوزة أشوفك ولا عاوزة أشوف أبويا. مش عاوزة. مش عاوزة. إطلعى برة. إطلعى.
قامت عواطف بدس الكيس في ملابسها ثم قالت بسخرية: هطلع يا أختى، قال هطلع من الجنة.
خرجت عواطف ثم صفعت لمار الباب خلفها ثم انهارت أرضًا تبكي بشدة قائلة: يارب سامحنى، والله ما كنت أعرف. يارب أحمينى من شرهم يا رب. يارب.
أخذت تبكي إلى أن غفت في مكانها.
في شركة حامد الداغر في مكتب سليم القابع على مكتبه منكب على مجموعة من الأوراق يراجعها. رفع رأسه حينما دلفت ميس إلى المكتب تتبختر في مشيتها بملابسها اللافتة ومكياجها الصارخ.
سليم ببرود: ممكن أعرف جاية ليه هنا؟ دة مكان شغل.
ميس: إخس عليك يا سليم، بقى دى المقابلة اللى تقابلها لخطيبتك بردو؟
سليم: ميس، ما تلفيش كتير، أظن إنك عارفانى كويس أوى، وعارفة كمان إنى ما بحبش حد يقاطعنى وأنا بشتغل.
ميس: طيب هنتقابل النهاردة ولا إيه؟
سليم: لما أشوف هخلص شغل وهقولك.
ميس: لا، مليش دعوة، علشان خاطرى يا سليم وافق، وأوعدك إنك مش هتندم صدقينى.
سليم: وأنا قلت هخلص شغل وأشوف مواعيدى وأرد عليكى.
ميس بغيظ: ماشى يا سليم، هسيبك تخلص شغل، وأنا همشى أروح للفرندز بتوعى.
مالت عليه تقبله ثم اعتدلت قائلة: تشاو، أشوفك بعدين يا بيبى.
قالت ذلك ثم غادرت المكان وعاد سليم يتابع عمله بتأفف منها ومن تصرفاتها، فهو كوالده وافق عندما أخبره إنه سيستفاد من والدها في العمل وسيقدم له الكثير من الخدمات. فالزواج منها سيحقق كل ذلك وهو لا يمانع أبدًا، فهي جميلة يقضي معها بعض الأوقات فلا مانع أبدًا لديه في إرضاء رغباته ووالده معًا.
