وضعته ندى في سريره وأمسكته لعبه حتى لا يبكى. وبعد أن انتهت نزلت إلى الأسفل فوجدت صفاء.
صفاء بقلق: مالك يا حبيبتى؟ معيطة ليه؟ وماله سليم كمان؟
ندى: سليم مش عارفة ماله، عمال بيصرخ ومش راضى يسكت أبدًا.
صفاء: طيب يا بنتى، إستنى في العربية على ما أجهز وأجيلك بسرعة.
ندى: حاضر يا ماما.
ذهبوا إلى الطبيب وبعد فحصه له.
ندى بقلق: خير يا دكتور، طمني، ماله سليم؟
الدكتور: متقلقيش، هو بس عنده حمى داخلية، وضربتله حقنة وشوية ويكون كويس. أنا كتبتله على حقنتين كمان ياخدهم، واحدة بالليل وواحدة في الصبح التانى إن شاء الله.
ندى: يعنى هو كويس يا دكتور؟ أومال بيعيط ليه؟
الدكتور: دة نتيجة السخونية مش أكتر، على العموم شوية وهيكون كويس.
صفاء: إن شاء الله. شكرًا يا ابنى، تعبناك معانا.
الدكتور: العفو، دة واجبى.
صفاء: يلا بينا يا بنتى.
بعد ذلك صعدوا إلى السيارة ثم انطلقوا عائدين إلى الفيلا.
عند حامد ومصطفى في الشركة.
حامد بغضب: فين الأستاذ سليم؟ مشرفش ليه لحد دلوقتى؟
مصطفى بإرتباك: أاا مممم. أصل، أصل.
حامد: أصل إيه؟ البيه أكيد كان سهران سهرة من سهراته غير المناسبة اللى زيه. تقب وتغطس دلوقتى وتجبهولى مطرح ما هو موجود.
مصطفى: حاضر يا بابا، بعد إذنك.
خرج مصطفى من مكتب والده ويقوم بالاتصال على سليم قائلًا بغيظ: الزفت دة مش هيتعلم أبدًا، وبتيجى على راسى أنا.
على الجانب الآخر كان سليم نائمًا إلى جوار ميس في أحد الشقق.
استيقظت ميس قائلة بتأفف وهي توكز سليم من كتفه: سليم، أوف، سليم، إصحى، تليفونك بيرن.
سليم بنعاس: أيوا، في إيه؟
ميس: تليفونك بيرن يا سليم، مش سامع يعنى؟
جلس سليم نصف جلسة ومسك الهاتف وفتحه ووضعه على أذنه قائلًا بنعاس: ألو. أيوا يا مصطفى.
مصطفى بغيظ: يا برودك يا أخى. كمان نايم لحد دلوقتى وبابا قالب الدنيا عليك هنا.
سليم: طيب ماشى، أنا هلبس وجاى أهو.
مصطفى: متتأخرش يا أخويا، ولما تحب تعمل اللى إنت بتهببه دة إبقى ما تتأخرش وتيجى على البيت متباتش برة.
سليم: مصطفى حبيبى، يلا سلام، أشوفك بعدين.
قال ذلك ثم أغلق الهاتف بتأفف.
ميس: عاوزك ليه مصطفى؟
سليم: أبدًا، إتأخرت على الشغل، ولازم أمشى دلوقتى.
نهض سليم من الفراش ثم توجه إلى الحمام واغتسل ثم خرج وأبدل ملابسه ورحل إلى الشركة.
في شركة حامد الداغر يدلف شريكه ماجد وجلس على الأريكة إلى جواره بعد السلامات والترحيبات.
حامد: المكتب منور يا ماجد.
ماجد: منور بأهله يا حامد. ها، إيه أخبار الشغل؟
حامد: عال العال. والإنتخابات اللى داخل فيها دى واخدة كل وقتى وتفكيرى.
ماجد: متقلقش، أنا مكلملك أفضل شركة للدعايا بتاعتك. أما الناس اللى هتتخبك دى بردوا سيبهالى أنا.
حامد: مش عارف أشكرك إزاى.
ماجد: ولا شكر ولا حاجة، إحنا أهل، ولا إيه؟
حامد: آه طبعًا. بالحق، عاوزين نحدد فرح الولاد بقى.
ماجد: والله إحنا جاهزين، شوفوا انتوا تحبوه إمتى.
حامد: أنا بقول خليها أول الشهر الجاى، دة ها حلو، يكون نتيجة الإنتخابات ظهرت، علشان المناسبة تبقى إتنين إن شاء الله.
ماجد: وكذلك، ماشى، مفيش مشكلة. خد بقى، عاوز إمضتك على البضاعة دى علشان أخلى الرجالة تستلمها من المينا.
حامد وهو يمضي على الأوراق: ماشى يا سيدى، إتفضل. بس مكانش ليه لزوم تتعب نفسك، كنت جبت أى حد بالورق.
ماجد: لا، ما أنا كنت عاوز أشوفك، ليا مدة مشفتكش فيها، قولت أجى أشوفك.
حامد: فيك الخير والله.
ماجد: دلوقتى هقولك على الخطة بحكم خبرتي اللي لازم تمشى عليها علشان تضمن نجاحك في الإنتخابات.
حامد: ماشى، قول، أنا سامعك.
ماجد: بص، انت هتعمل…
في شقة ممدوح في غرفة سميحة تجلس معها ورد تحفظها القرآن.
ورد: ها، كدة حفظتها صح؟
سميحة: أيوة صح، شطورة يا ورد، هجبلك شيكولاتة من بتوع البهوات، إبسطى يا ستى.
ورد بفرح: بجد؟ ربنا يخليكى يا سميحة.
سميحة: ويخليكى ليا يا بنت عمتى.
ورد: هتحفظينى السورة اللى جاية إمتى علشان أعمل حسابى؟
سميحة: خليها على أول الأسبوع يا حبيبتى.
ورد: ماشى يا سمسم.
دلفت زوجة خالها تنظر لها باستحقار: إنتي يا زفتة، قاعدة عندك بتعملى إيه؟
وقفت ورد وهي تنظر للأرض بخوف: ها، أصل، أصل خلصت شغلى كله والله يا مرات خالى.
منيرة: طيب غورى إتلقحى في أوضتك، لا تبوظى البت، عاوزاها تجيب تقدير.
ورد بحزن: حاضر يا مرات خالى.
ذهبت ورد لغرفتها تفرغ حزنها هناك.
منيرة: ذاكرى دلوقتى يا سميحة علشان بالليل شبكة شروق بنت أم عاطف جارنا.
سميحة: حاضر يا أما، بس هناخد ورد معانا؟
منيرة: ورد مين وزفت مين دى؟ هتتلقح هنا لحد ما نيجى. أنا طالعة من هنا بدل ما تعليلى الضغط.
خرجت منيرة ودلفت إلى غرفتها ووجدت ممدوح أمامه رزمة من النقود يقوم بعدها.
منيرة بفرح: إش إش، إيه الفلوس دى كلها يا ممدوح؟ شكلهم راضين عنك خالص اليومين دول.
ممدوح: وميرضوش عنى ليه؟ دة أنا بعملهم كل اللى بيطلبوه.
منيرة: طيب يا أخويا، كنت عاوزة أفاتحك في موضوع كدة.
ممدوح: موضوع إيه دة يا منيرة؟
منيرة: الزفتة بنت أختك اللى متلقحة عندنا، ما دورتش على أهلها.
ممدوح: ما أهل البت دى ناس غناة أوى ومن عيلة كبيرة في مصر، بس مش معترفين بيها أصلًا. أصل جد البت دى كان شديد وبيميز بين الغنى والفقير، فأتبرى من إبنه لما عرف إنه ماشى مع أمها غير المناسبة، فساب الراجل العز والهنا علشانها. وعاشوا مع بعض لحد ما خلفوها، وبعدين راحوا في الواقعة زي ما إنتي عارفة.
