منيرة: يعنى اللى جابلك البت دى مكانش وداها عندهم وإخلصنا؟ هى ناقصة هم.
ممدوح: متقلقيش، هتروح لأهلها بس مش بلوشى كدة، ولله وللوطن.
منيرة: أومال بإيه؟ نورنى يا أخويا.
ممدوح: كله بأوانه يا منيرة، إستنى وانتي هتعرفى.
ثم تمتم بصوت منخفض: ودة طبعًا مش قبل ما آخد اللي أنا عايزه، والنهاردة فرصة من ذهب. هههههه، ولا وهتقعي تحت إيدي يا ورد، وشوفي مين هينجدك مني.
منيرة: بتقول حاجة يا ممدوح؟
ممدوح بإنتباه: لا لا، ما بقولش. أنا نازل أشوف الرجالة تحت.
تركها ورحل فقالت منيرة: هههههه، والله وهنخلص منك ومن همك يا بت نسمة. وهنستفيد من وراكي كتير.
في قسم الشرطة يخرج مراد برفقة عمر ويذهبا إلى سيارة سليم الذي كان بانتظارهم مستندًا عليها.
عمر وهو يعانقه: أبو السواليم حبيب قلبي.
سليم: بطل ياض الكلمة دي. بيئة أوى.
عمر: اسم الله عليك يا تربية الشانزليزيه.
سليم وهو يسلم على مراد: والنبى قوله حاجة يا مراد بدل ما أفرمهولك هنا.
عمر: متقدرش، انت واقف في حتتنا، وأى غدر منك هيجيبوك من قفاك زى الأشخاص المخالفين.
سليم وهو يلكمه في وجهه بقوة: أدينى في حتتكم أهو، ورينى هتعمل إيه.
عمر متألمًا: اااه، يضر بيتك يا سليم.
مراد: بس إنتوا الاتنين، وخلينا نمشى.
سليم: يلا بينا.
صعدوا إلى السيارة ثم انطلقوا إلى منزل عواطف.
في منزل لمار ليلًا.
الفتاة: واو، بجد إنتي تحفة وتصميمك تحفة، دة زى الجاهز بالظبط. تسلم إيدك يا لمار.
لمار: ربنا يخليكى، دة بس من زوقك يا هدير.
هدير: لا بقى، دا أنا هجيب صحباتى هنا. دة أنا لما هوريهم الفستان بتاعى هيتهبلوا عليه.
لمار: ياااه، مش للدرجة دى يعنى. ماشى يا حبيبتى، هستناهم.
هدير وهي تتناولها النقود: طيب خدى الحساب، لازم أمشى دلوقتى.
لمار: خليكى يا حبيبتى شوية.
هدير: لا لازم أمشى، ماما هتقلق عليا.
لمار: ماشى يا هدير، أشوفك بعدين. سلميلى على ماما.
هدير: ماشى، يوصل يا لمورة. سلام.
لمار: سلام.
أغلقت لمار الباب وجلست على الكرسى تنظر للمكان ببعض القلق.
لمار: يووووه، بطلى هبل يا لمار، مفيش حاجة تخوف، إنتي بس متهيألك، مفيش عفاريت. مفيش. أنا أهو منورة الشقة كلها ومش هيحصل حاجة. أنا هروح أصلى العشا وأنام علطول.
قالت ذلك ثم دلفت إلى الحمام وتوضأت ثم خرجت وفرشت المصلية ثم شرعت في الصلاة بخشوع، وبعد أن انتهت من صلاتها أخذت تتلو ما تيسر من آيات الذكر الحكيم.
وبعد أن انتهت دلفت لغرفة نومها وخلعت حجابها وتمددت على السرير وأندست في الغطاء من رأسها لأخمص قدميها، ثم أخذت تقرأ أذكارها، وما إنتهت أخذت تسرح بخيالها في حياتها في الماضى وما هي عليه الآن في شقة ممدوح.
منيرة: يلا يا سميحة علشان نمشى، بلاش لكاعة.
سميحة: حاضر يا أما، حاضر.
تقدمت ورد من منيرة بخوف قائلة: أاا، مرات خالى، ممكن، ممكن أروح معاكوا؟ خدينى معاكى والنبى.
منيرة: نعم يا روح أمك؟ بت إنتي مش ناقصالك على المسا.
