رواية عشق الأدهم
البارت الأول
حكايتنا زي حكايات كتير في بيوتنا المصرية، بدأت بأم نفسها تفرح ببنتها وتطمن عليها، وتشوفها في بيت زوج يحافظ عليها ويبقى سند ليها. جوزتها جواز صالونات، ومن هنا هتبدأ حكايتنا.
همس بنت جميلة ورقيقة، لدرجة إن أي حاجة بسيطة ممكن تأثر فيها، حتى لو شافت قطة مصابة في الشارع. كل أحلامها كانت إنها تحب وتتحب وتتجوز وتكوّن أسرة سعيدة، لكن نصيبها كان مختلف.
اتجوزت همس وهي عندها عشرين سنة، وبعد تسع شهور ربنا رزقها بحور، اللي كانت نسخة من مامتها. حبت جوزها محمد بالعِشرة، ورضيت بحياتها، وبعد سنتين خلفت آدم. كانت مرتاحة إلى حد ما، وحمدت ربنا على حياتها.
وفي يوم، كانت بتذاكر لحور، وفجأة دخل جوزها.
محمد، وملامحه متغيرة: مساء الخير.
همس، وهي ملاحظة تغير ملامحه: مساء النور، أحضّرلك العشاء؟
محمد وهو داخل أوضة النوم: لا، شكرًا.
فضلت مكانها بتبصله باستغراب، وبتسأل نفسها: هو ماله النهارده؟
كملت مذاكرة لبنتها، وبعد ساعة كانت نيمت عيالها، ودخلت تشوف جوزها ماله.
همس: مالك يا محمد؟ حد مزعلك؟
محمد: لا. العيال ناموا؟
همس: آه، ناموا. إنت كويس؟
محمد: ما أنا قلت كويس، في إيه؟ مالك إنتِ؟
همس: هو إنت متخانق في الشغل؟
محمد، بنبرة ضيق: لا.
همس: طيب مالك؟
محمد، بصوت عالي نسبيًا: ما أنا قلت مفيش! إنتِ مبتفهميش ولا إيه؟ إيه مالك مالك؟ ما تفصليني شوية!
ولأنها مش من النوع اللي بيحب المشاكل، قالتله بصوت مخنوق بالدموع:
همس: خلاص، أنا آسفة إني سألتك.
لفت وادّته ضهرها، وغمضت عينيها، ودموعها نازلة في صمت. كانت بتفكر: ليه بيعمل فيها كده؟ بقاله كام يوم مش طايق البيت، ولا حتى عياله. ده أنا مش فاكرة آخر مرة اهتم بيا إمتى! صحيح الموضوع مش فارق معايا قوي، بس بقى حاجة ملحوظة. يا ترى إيه اللي مغير حاله؟
ومحستش بنفسها لما نامت من كتر العياط والتفكير.
أما محمد، ففضل سرحان شوية، وبص عليها، ولما شاف دموعها حس بالضيق، لكنه افتكر إنه لازم يكمل اللي بدأه. قام من جنبها بهدوء، وخرج، ومسك تليفونه واتصل برقم.
محمد: ألو، أيوه، عملت زي ما اتفقنا.
سكت يسمع الطرف التاني، وبعدها كمل:
محمد: أنا عارف، حاضر. خلاص، هانت. والله طيب، سلام.
دخل تاني الأوضة، وبص على همس لقاها نامت ودموعها على خدها. طلع على السرير ونام.
تاني يوم، صحيت همس وهي مصدعة من قلة النوم والعياط طول الليل. قامت صحت حور علشان تجهزها للمدرسة، وأثناء ما كانت بتلبسها، ظهر محمد وقالها:
محمد: أنا نازل وهتأخر بليل. ياريت مش كل خمس دقايق تتصلي وتقولي هاجي إمتى.
همس، باستغراب: أنا من إمتى بتصل بيك كده يا محمد؟ إلا لو في حاجة ضرورية، غير كده مش بتصل.
محمد: آه، وتتصلِي ليه؟ هو إنتِ فاضية؟ كفاية عليكي عيالك والمدرسة وأكلهم ولبسهم، لكن أنا آخر حاجة بتفكري فيها. مجرد بنك بيصرف وخلاص!
همس: في إيه يا محمد؟ إنت بتتلككلي؟ وبعدين هما عيالي لوحدي؟ ولو مهتمتش بيهم وهما لسه أطفال، مين هيهتم؟ وبعدين أنا عمري ما طلبت حاجة لنفسي قبل كده.
محمد: إيه بتتلككلي دي؟ احترمي نفسك وإنتِ بتكلميني يا هانم! ولا أهلك ما علموكيش تتكلمي معايا إزاي؟ لو متعرفيش، أعرّفك!
همس، وهي خلاص دموعها هتنزل: هتعمل إيه يا محمد؟ هتضربني؟ عمومًا خلاص، اعمل اللي إنت عايزه. أنا نازلة، عن إذنك.
سابته وأخدت حور وآدم ونزلت، وفضل محمد يبصلها. ضميره وجعه للحظة، لكنه حاول يقنع نفسه وقال: مش هينفع غير كده.
وبعد كام يوم، كانت معاملة محمد ليها بتزداد جفافًا، وحتى عياله مبقاش بيتكلم معاهم زي الأول. ولما همس لاحظت إن الوضع بيزداد سوءًا، قررت تدور وراه.
بدأت بحسابه على مواقع التواصل، وبحكم دراستها وخبرتها في مجال الكمبيوتر، قدرت توصل لرسائل كتير كانت بينه وبين واحدة تانية.
اتصدمت من اللي شافته!
رسائل كتير مع واحدة، ومن الواضح إن بينهم علاقة عاطفية.
بس لحظة!
الرسائل بدأت من سنة كاملة! يعني إيه؟ كانت مخدوعة طول المدة دي وهي مش حاسة؟ طيب إزاي؟ يمكن لأنها مكانتش بتحبه بالشكل الكافي، فماخدتش بالها من التغيير.
كملت قراءة الرسائل، وكل ما تقرأ أكتر، دموعها تنزل.
دموع قهر ووجع، وحلم كانت نفسها تحققه، لكنه ما اتحققش.
وفي آخر رسالة، كان بيقولها إنه مش قادر يبعد عنها، ولا يكمل مع مراته!
ضحكت همس ضحكة كلها وجع، وقالت لنفسها:
مش قادر يكمل معايا؟ ياااه، للدرجة دي أنا رخيصة عندك يا أبو عيالي؟ ده أنا عمري ما كنت وحشة معاك، ورغم إن مفيش بينا حب كبير، كنت بتقي ربنا فيك وفي بيتي. بس أقول إيه؟ حسبي الله ونعم الوكيل.
وفي آخر الرسائل، لقتهم متفقين يتقابلوا بالليل في كافيه.
قفلت الموبايل وهي في حالة صدمة. فضلت تفكر هتعمل إيه، ومسحت دموعها وقررت إنها لازم تنهي المهزلة دي.
رجعت فكرت في عيالها: هيتربوا من غير أب إزاي؟ لكن هو أصلًا مش مهتم بيهم، وأنا هكبرهم وأعلمهم، وعمرى ما هسمح لحد يجرحهم.
وأخدت قرار مفيش رجوع فيه…
رواية عشق الأدهم
البارت الثاني
بعد تفكير كتير، قررت همس تعمل إيه. لبست وجهزت عيالها، ونزلت راحت عند مامتها.
همس، وهي داخلة عند مامتها وبتتكلم بسرعة: مساء الخير يا ماما، عاملة إيه؟ بعد إذنك خلي العيال معاكي، عندي مشوار مهم و…
قاطعتها مامتها وهي بتقول:
هناء: إيه يا بنتي؟ بالراحة! مالك؟ تعالي اقعدي. مستعجلة كده ليه؟ وإيه المشوار اللي مخليكي متوترة بالشكل ده؟
همس، والحزن واضح عليها، راحت قعدت جنبها وقالت:
همس: مشوار مهم، ولما أرجع هحكيلك على كل حاجة.
هناء، وهي بتمسح على ضهرها: مالك يا همس؟ فيكي إيه يا حبيبتي؟ عمري ما شوفتك حزينة كده غير يوم ما باباكي اتوفى.
افتكرت همس يوم وفاة باباها، وانهيارها وقتها، وكانت لسه عندها خمسة عشر سنة.
همس، والدموع بدأت تتجمع في عينيها: بعدين يا ماما، بعدين. خلي بالك من العيال لحد ما أرجع. معلش هتقل عليكي.
هناء: تتقلي إيه بس يا حبيبتي؟ روحي، ربنا يصلح الأحوال.
سابتها همس ونزلت، وفضلت عيون هناء متعلقة بيها، وهي حاسة بقبضة في قلبها، ودعت ربنا:
هناء: استر يا رب.
وفي نفس الوقت، نزلت همس وركبت تاكسي، وراحت للمكان اللي محمد هيقابل فيه حبيبته.
وصلت، وفضلت قاعدة في العربية. كانت خايفة تنزل، ومش عارفة هتقدر تشوف جوزها مع واحدة تانية ولا لأ. حتى لو مش بتحبه، مش هتستحمل تشوف الموقف بعينيها، لكن كان لازم تواجه.
السواق بص لها باستغراب وقال:
السواق: هو إنتِ نازلة ولا إيه؟ معلش، بقالي عشر دقايق واقف.
همس بصتله بتوهان: آه، آه، نازلة أهو.
نزلت ووقفت شوية، وغمضت عينيها تهيئ نفسها للموقف، وبعدها فتحت عينيها ومشيت في اتجاه الكافيه.
دخلت، وفضلت تدور بعينيها على جوزها، بتبص يمين وشمال، لحد ما شافته!
محمد كان قاعد على كنبة، وجنبه واحدة ماسكة إيده، وقريبة منه، وبيتكلموا ويضحكوا.
قربت منهم ووقفت قصاده.
انتبه محمد إن في حد واقف قدامه، ورفع عينيه، ولما شافها، ساب إيد اللي قاعدة جنبه ووقف مصدوم، مش عارف يقول إيه.
همس: متوقعتش، صح؟ بس أهو أنا وفرت عليك مؤامرات وخطط علشان تخلص مني ومن عيالك. بس يا ترى هي تستاهل تعمل علشانها كل ده؟
محمد: همس، أنا…
قاطعته همس: إنت إيه؟ كمل! مش عارف تقول إيه، صح؟ هتبرر بإيه؟ أنا عمري ما قصرت معاك، وعمري ما خليتك تنام زعلان في يوم. بالعكس، كنت باجي على نفسي علشانك وعلشان عيالي. مفكرتش فيا؟ بلاش، مفكرتش في عيالك؟
سكتت لحظة، وبعدين كملت:
همس: بس عارف أنا مش زعلانة ليه؟
محمد حاول يتكلم، لكن اللي كانت قاعدة معاه قامت وبصت لهمس، وبعدها قالتله:
لورا: مالك؟ إنت عامل كده ليه؟ هو مش المفروض إنك خلاص كده كده هتسيبها؟ خايف منها ليه؟ ما تقولها إنك…
محمد، مقاطعًا: لورا، لو سمحتي اسكتي إنتِ دلوقتي.
همس: لو سمحت، إنت بجد كده؟ من إمتى؟ أنا مش قادرة أصدق. بس عارف أنا مش زعلانة ليه؟ علشان أنا عمري ما حبيتك.
بصلها محمد بصدمة!
همس، باستغراب من رد فعله: أيوه، عمري ما حبيتك. كنت عايشة معاك بما يرضي الله وخلاص، لكن حب؟ لا، عمري ما حسيته معاك. بالعكس، كنت ساعات ببقى عايزة أبعد، بس كنت براجع نفسي علشان عيالي، وبقول اهي عيشة والسلام. بس خلاص، الحمد لله، لحد كده.
أخدت نفس وكملت:
همس: إنت من النهارده بره حياتي. كل اللي يربطني بيك عيالي وبس.
بصتله بوجع وقهر على عشرة وسنين ضاعت من عمرها، وقالت:
همس: طلقني يا محمد.
ضحكت لورا بشماتة وقالت:
لورا: أوعي تكوني فاكرة إنه هيجري وراكي ويقولك لأ! خلاص يا حبيبتي، هو أصلًا كان ناوي يطلقك، بس يا عيني كنتِ صعبانة عليه. مش عارفة ليه، بس أهي جت منك يا حلوة!
محمد بص للورا علشان تسكت، لكن همس ردت عليها بكلام خلاه يتصدم للمرة التانية:
همس: لا والله، فيه الخير إني صعبت عليه. وعلى العموم، اشبعي بيه. هو أصلًا مش فارق معايا، ولا عمره كان فارق.
وسابتهم ومشيت.
قعد محمد مصدوم من كلامها، وفضل يفكر مع نفسه: أنا صحيح حبيت غيرها، بس كان ضميري بيوجعني عليها. كنت فاكر إنها بتحبني، يعني كانت عايشة معايا كل ده وهي مش…
قاطعت أفكاره لورا وهي بتسأله:
لورا: مالك؟ إنت زعلان عليها ولا إيه؟
محمد: لا، هزعل ليه؟ إنتِ عارفة إني كده كده كنت هسيبها، وأهو كويس إنها جت منها.
وفي نفس الوقت، كانت همس بتجري وهي حاسة بالضياع، ودموعها متحجرة في عينيها. ركبت أول تاكسي قابلها، وكأن الدنيا كلها بقت تقيلة عليها.
كان السواق مشغل أغنية حزينة، ففضلت همس باصة من الشباك، وسايبة دموعها تنزل في صمت.
كانت حاسة إنها بتودّع مرحلة كاملة من حياتها، بكل اللي فيها من ذكريات وأحلام وتعب.
ومع كل دقيقة كانت بتبعد فيها عن المكان، كانت بتحاول تقنع نفسها إن القرار اللي أخدته هو بداية جديدة، حتى لو كانت البداية صعبة.
لكنها ما كانتش تعرف إن اللي جاي في حياتها هيكون مختلف تمامًا…
