أما بالداخل كانت تلك البريئة تبتسم أثناء نومها، فهي كعادتها تحلم بمعشوقها كل ليلة وتبتسم ابتسامة سرقها منها الزمن.
في صباح اليوم التالي في قسم الشرطة، بينما كان مراد يراجع بعض القضايا، دلف عمر قائلًا: إبسط يا عم، لقينا مكان مرات عابدين.
هب واقفًا ينظر إلى عمر بصدمة ممزوجة ببعض السعادة.
مراد: بتقول إيه يا عمر؟ عيد اللى قولته تانى كدة.
عمر بضحك: إيه يا عم مالك؟ ودانك تقلت ولا إيه؟ بقولك الرجالة بتوعنا اللي كلفناهم بمهمة البحث عنها لقيوها.
مراد بجد: الحمد لله يا رب، أخيرًا حق أبويا هيرجع.
عمر: هتعمل إيه؟ لازم يكون عندك إذن بالتفتيش.
مراد: أنا لا هعمل إذن بتفتيش ولا يحزنون.
عمر: أومال هتعمل إيه يا نبيه عصرك؟
مراد: هتشوف. أدينى قاعد بقالى 6 شهور مش عارف أخد حق أبويا. المهم هى عايشة لوحدها ولا حد معاها؟ ولادها مثلًا؟
عمر: لا، إطمن، عايشة لوحدها، هى أصلًا مش معاها غير ابن واحد بس.
مراد بغل: ابن الـ يقع في إيدى بس. المهم دلوقتى بعد ما خلص شغلى هنا علشان ملفتش الإنتباه. مراد متداركًا نفسه: أنا آسف يا عمر، إتعصبت ومخدتش بالى.
عمر: أنا مش زعلان منك يا مراد. وعلشان عصبيتك وتهورك دة لازم أروح معاك. ها، قولت إيه؟
مراد بإستسلام: قولت لا إله إلا الله. ماشى يا عمر، روح معايا. يا سلام عليك إنت وسليم لما ترخموا بتبقوا حاجة لا تطاق.
عمر بضحك: هههههه، ماشى، مقبولة منك يا صاحبى.
مراد: طيب يلا يا اخويا على مكتبك، مش عاوزين حد يشك في حاجة. أنا الود ودى أروح دلوقتى، بس نصبر، ومالو الصبر حلو بردو.
عمر: ماشى يا ميرو، يلا سلام.
مراد: إمشى يا عمر، إمشى بدل ما أجى أفش خلقى فيك.
عمر: وعلى إيه؟ الطيب أحسن. أشوفك بعدين يا صاحبى.
خرج عمر من المكتب فتنهد مراد قائلًا: أخيرًا يا بابا، همسك أول خيط في القضية وهاخد بحقك يا حبيبى.
قال ذلك وشرد في تلك الذكرى المؤلمة.
Flash Back
منذ ستة أشهر كان مراد خارجًا هو ووالده من الشركة، وعند وصولهم إلى السيارة قام أحد القناصة بإطلاق النار على والده فوقع أرضًا في الحال.
أما هو نظر بصدمة لوالده الجاثي أرضًا وبسرعة توجه إليه وأسنده من الخلف قائلًا بدموع: بابا، بابا، قوم. قوم يا حبيبى. متسبناش يا بابا، أرجوك. يا ناس حد يجيب إسعاف. حد يجيب إسعاف. بابا خليك معايا. خليك معايا والنبى. متقفلش عينك.
محمد بأنفاس متقطعة: خلى بالك من أمك وأختك.
مراد: لا لا، إسكت، إسكت، متتكلمش. يا رب. يا رب.
بعد عدة دقائق وصلت الإسعاف وتم نقله إلى المشفى ومن ثم إلى غرفة العمليات.
جاءت والدته تركض في الطرقة برفقة تسنيم والبقية بعد أن أخبرهم فريد بذلك الخبر.
أمينة ببكاء: أبوك جراله إيه يا مراد؟ رد عليا، رد عليا.
فريد: إهدى يا أمينة، مش كدة الله. أخويا إتصاب وهو جوة في العمليات، إدعيله.
تسنيم ببكاء: لا لا، بابا يا مراد، بابا، أنا عاوزة بابا.
معتز: إهدى يا تسنيم، مش كدة.
ظل الجميع يقفون في صمت ويدعون ربهم بالبكاء والدموع أن يحفظ محمد لهم. بعد ساعتين خرج الطبيب من غرفة العمليات فركض الجميع إليه يسألوه بأمل.
مراد: بابا عامل إيه؟ أرجوك طمنا يا دكتور.
الدكتور بحزن: إحنا عملنا اللي علينا، بس للأسف المريض ما لم يكمل، البقاء لله.
انهارت أمينة وفقدت وعيها في الحال فجرت عليها فاطمة وزينة، وبعد بعض الوقت فاقت من إغمائها ولكنها انخرطت في البكاء.
وتسنيم التي انهارت في أحضان زوجها.
مراد بضياع: إنت بتقول إيه؟ بابا ما ممتش، بابا عايش. أوعى، أنا داخله. إنت كداب.
دلف مراد إلى الداخل ووجد والده مغطى بغطاء أبيض. ذهب إليه وكشف وجهه وانهار باكيًا على صدره: بابا قوم يا بابا. متسبناش أرجوك، متسبناش. قوم، ماما برة بتعيط وتسنيم كمان عاوزينك يا بابا. قوم. آاااااه يا بابا، ااااه.
فريد بدموع وتماسك: وحد الله يا ابنى، مش كدة.
مراد: بابا راح يا عمى، بابا راح.
فريد: إدعيله يا ابنى، إدعيله، هو عند اللى خلقه اللي أحن عليه مننا. قوم يا ابنى، انت سند أمك دلوقتى، هى محتجالك وكمان تسنيم. فين مراد الظابط؟
مراد: انا ضهرى إتكسر يا عمى، أنا بقوى بيه.
فريد: ما تقولش كدة، أومال أمك وأختك يقولوا إيه؟ خليك متماسك علشانهم.
حزن الجميع على رحيل والد مراد وقاموا بفتح تحقيق لكشف ملابسات الواقعة.
وأقيم عزاء لمحمد حضره الضباط ورجال الأعمال ممن يعرفونه. وبعد انتهاء العزاء بأيام قليلة كان مراد يجلس في غرفته منزويًا لا يريد رؤية أحد. جاءه اتصال هاتفه برقم غريب فأجاب ووضعه على أذنه.
المتصل بشر: يا رب تكون إتعلمت الدرس كويس يا… يا حضرة الرائد. أدى جزات اللى يقف في طريقى. واه البقية في حياتك. حرص من اللى جاى.
مراد: مين معايا؟ مين اللى بيتكلم؟
ولكنه أغلق الهاتف فجن جنون مراد الذي أخذ يكسر في أي شيء تقابله يداه وأخذ يصيح عاليًا: يا ولاد الـ، والله لأوريكوا. تقعوا في إيدى يا حيوانات بس. يا ولاد الـ.
أظلمت عيناه وامتلأت بالضيق والغضب تجاه هؤلاء الذين تسببوا في استهداف والده.
ومنذ تلك اللحظة وهو يتوعدهم باسترداد الحق.
Flash Back
عاد من ذاكرته إلى الواقع ولاحظ تساقط دموعه فقام بمسحها على الفور قائلًا: ربنا يرحمك يا حبيبى. متقلقش يا بابا، حقك هيرجع ولو هيكلفنى موتى.
قال ذلك ثم عاد لمتابعة عمله المنكب عليه.
في فيلا حامد الداغر في غرفة نوم مصطفى يقف أمام المرآة يصفف شعره استعدادًا للذهاب إلى العمل. كانت ندى تقف بمقربة من السرير سارحة في مظهره وطالته الوسيمة وهي تحمل سليم الصغير وتسير به ذهابًا وإيابًا لعله يتوقف عن البكاء الذي يبدو إنه متعب.
ندى بقلق: مالك يا روحى؟ فيك إيه يا مصطفى؟ سليم شكله تعبان النهاردة، تعالى معايا نوديه للدكتور.
مصطفى: روحى مع أمى، انا مش فاضى ورايا شغل.
ندى ببعض الغضب: إنت بتقول إيه؟ ابنك تعبان وتقولى روحى مع أمى؟
مصطفى بغضب وهو يمسك زراعها بقوة ألمتها وسط صراخ طفلها: بقولك إيه، صوتك دة ميعلاش تانى، إنتي سامعة؟
ندى بتألم: حاضر حاضر، بس سيبنى، الولد بيعيط.
تركها مبتعدًا عنها وأخذ متعلقاته ونزل للأسفل.
ندى بدموع: بس يا روح ماما، إنت حاضر، هنروح للدكتور، يلا يا حبيبى. إستنى بس هلف الطرحة.
