صدرت تأوهات بسيطة من شوشو، قامت على اثرها.
شوشو بلهفة: مالك؟ انت كويسة؟
شوشو بتعب: أنا فين؟ وإيه اللي حصل؟ ثم بدأت تتذكر اللي حصل معاها، صرخت صرخة قوية.
دخل على إثرها أسر: مالها؟ في إيه؟
استغربت شوشو من وجود أسر.
فريدة أخدتها في حضنها: اهدي يا حبيبتي، محصلش حاجة، الحمد لله لحقناك في الوقت المناسب. ووجهت كلامها لأسر: من فضلك يا باشمهندس نادي الدكتور.
خرج أسر وهو حزين على شوشو.
شوشو أخذت تبكي في حضن فريدة.
أخذت فريدة تربت على ضهرها بحنان: والله ما حصل حاجة، انت كويسة، والدكتور طمني.
شوشو: طب احنا جايين هنا ليه؟ ودادي؟
فريدة: احنا هنا يا ستي علشان اللي كان مديكي حاجة، وكنا لازم نطمن عليكي. وباباكي يا ستي ما يعرفش حاجة لسه، ممكن تهدي.
شوشو بصت ليها كتير، وكانت في عينيها أسئلة كتير.
فريدة شافت ده: ممكن نطمن بس عليكي، وبعد كده هجاوبك على كل الأسئلة اللي في دماغك. وقطع كلامها خبط الدكتور.
دخل الدكتور وبعد الكشف طمنهم عليها.
فريدة طلبت منه إنه يسمح ليهم بالخروج، وافق الدكتور على شرط إنهم ياخدوا بالهم منها.
خرجت فريدة بلغت أسر إنهم اطمنوا على حالة شوشو، وسمح ليهم الدكتور بالخروج، وطلبت منه إنه يخلص إجراءات الخروج.
ودخلت تساعد شوشو في اللبس.
وبعد شوية استأذن أسر ودخل وبلغهم إن كل الإجراءات خلصت، ولو خلصوا يقدروا يتحركوا.
فريدة: احنا جاهزين.
خرجت فريدة وهي ساندة شوشو، وأول ما جاءت عينيها في عين أسر نزلت عينيها في الأرض. قرب منها وبصوت لا يسمعه غيرهم: طول ما أنا في ضهرك عمرك ما تنزلي راسك في الأرض، مفهوم؟ وبصوت عالي نسبيًا: قادرة تتحركي ولا أشيلك؟
شوشو بصوت ضعيف: لا، قادرة.
لعن نفسه ألف مرة إنه سبها ومفكرش يروح يسألها عن كلام كريستينا، بس أخد قرار بينه وبين نفسه إنه أول ما تقدر لازم يتكلم معها.
ساعدتها فريدة في دخول العربية، وقعدتها في الكنبة اللي ورا وقعدت جمبها، أما أسر أخد مكان السائق وتحرك.
فريدة لكسر حالة الصمت اتكلمت بخفة: معلش يا باشمهندس، شغلناك سواق النهاردة.
أسر وهو ينظر في المرآة: أكيد كل اللي هيشوفكم معايا هيحسدوني إني مركب اتنين زي القمر معايا.
اكتفت شوشو بابتسامة خفيفة، فهي مازالت غير مستوعبة ما مرت بيه. ساد الصمت مرة أخرى لحد وصولهم للفيلا.
نزلت فريدة وشوشو ودخلوا الفيلا، بس اتفاجئوا بمراد اللي بصوت غاضب: ممكن أعرف كنتوا فين؟
شوشو حسّت إن روحها بتنسحب منها، كان الدم هرب منها.
فريدة لحظت ده فدخلت على طول: أبدًا يا مراد، بصراحة أنا وشوشو صحينا بدري، وقولت يا بت يا فريدة ما تاخدي البنت الإنجليزية دي وتشوفي فطار، بس طلعت بنتك معدتها خفيفة أوي، مع أول تلات لقمات مسكت بطنها وقعدت ترجع. وبصراحة ما كنتش عارفة أتصرف، وقولت أعمل إيه؟
جاء صوت من خلفها: ما لقيتش غيري أصحيه من الصبح. كان هذا صوت أسر: وكلموني، خدتهم ورحنا المستشفى، بس عملوا للآنسة غسيل معدة.
فريدة حسّت إن ممكن مراد ميكونش مصدق، فقربت منه وهي عينيها في الأرض: أنا آسفة يا مراد بيه.
مراد سابها وراح ناحية شوشو اللي وشها باهت: انت كويسة يا حبيبتي؟
شوشو بصوت ضعيف: أيوه يا دادي، بس محتاجة أرتاح.
مراد نادى بصوت عالي: سميحة.
خرجت سميحة من المطبخ: نعم يا مراد بيه؟ لكن وقفت أول ما شافت شوشو بمنظرها ده، جريت عليها: مالك يا بنتي؟ فيكي إيه؟
مراد: خديها دلوقتي يا دادة، خليها تستريح.
اتحركت شوشو مع سميحة، وأول ما اختفوا.
مراد نظر لفريدة نظرة: من غير كدب، ممكن أفهم فيه إيه؟
فريدة: ما أنا قلتلك.
مراد قرب من فريدة أوي بوجه غاضب: موضوع الفطار ده مش مصدقه، علشان ببساطة هي بهدوم امبارح.
فريدة انصدمت من رده.
مراد: اتكلمي.
أسر: ممكن نتكلم في المكتب.
دخلوا التلاتة مع بعض، وحكوا لمراد كل حاجة، إلا كل ما كان بيسمع حاجة يضغط على ايديه أكتر، لحد ما خلصوا. قام وقف بمنتهى الغضب: ازاي كل ده يحصل من غير ما أعرف؟ أنا لازم أتصرف.
أسر: اللي حصل ده حسابي أنا معاه.
فريدة مسكت أيديه: أرجوك يا مراد، تهدى شوية، وشوشو مش لازم تعرف حاجة، أرجوك.
مراد اداها ضهره: من فضلكم، عايز أقعد لوحدي.
أسر شاور لفريدة، أخدها وخرجوا.
أما عند خالد، فاق بعد مدة، وبص حواليه وافتكر اللي حصل، خاف وقام غير هدومه ولم حاجته، ونزل أخد عربيته ومشى، وهو سايق اتكلم في التليفون.
الشخص بضحكة: صباحية مباركة.
خالد: ولا مباركة ولا زفت، كل حاجة باظت.
الشخص: ازاي؟
خالد حكى ليه كل حاجة.
الشخص: يانهار اسود، المهم تختفي دلوقتي.
خالد: أنا عملت كده فعلًا. سلام.
قفل الشخص مع خالد وهو بيبلع ريقه بصعوبة: دي أنا الباشا هيعاقبني، أنا مش هقوله قبل ما أظبط الحوار التاني.
أما في الفيلا عند مراد، طلعت فريدة علشان تطمن على شوشو، وجدتها نائمة فنزلت.
عدى يومين والوضع كما هو عليه، مراد متجنب كلامه مع فريدة، وشوشو مبتنزلش من أوضتها بحجة التعب، وأما أسر فراح يدور على خالد، بس للأسف كان اختفى ومعرفش يوصله نهائيًا.
وفي يوم كانت فريدة موجودة في الجنينه، دخلت عليها نعمة الخدامة تبلغ إن في حد بيسأل عليها، استغربت مين. راحت معها تشوف مين، اتفاجأت إنهم أخواتها علا وعلاء.
جريت عليهم فريدة: أهلًا، وحشتوني أوي. بس عرفتوا مكاني منين؟
كان علا وعلاء بيسلموا على فريدة بفتور جدًا.
فريدة استغربت طريقتهم: اتفضلوا. ومجوبتوش على سؤالي، عرفتوا مكاني منين؟
علاء: رمى الجريدة في وش فريدة: اتفرجي وانتي تعرفي.
فريدة مسكت الجريدة وبصت فيها، شافت صورة ليها هي ومراد في الحفلة.
علا: تقدري تفهميني إيه ده؟
فريدة غير مستوعبة أسلوب أخواتها في الكلام: بقى هو ده الإجابة؟ ليه؟ دلوقتي أنا هنا بحكم شغلي.
علا: شغل إيه؟
فريدة: شكلك ناسية إني ممرضة يا هانم.
علاء: ممرضة إيه اللي تتصور كده؟
فريدة: إيه في الصورة دي؟ دي حفلة، وفيها ناس كتير، وأنا مش لابسة لبس خارج ولا حاجة.
علا: بفرض إن كلامك سليم، تقدري تقولي بتعملي إيه هنا بعد ما المريض اللي مسئولة عنه خف؟
فريدة ساكتة مش قادرة تتكلم.
علاء: ما تنطقي. انتي هنا لحد دلوقتي بصفة إيه؟ وأمسك فريدة من دراعها: انطقي.
هي هنا بصفتها حرم مراد الحناوي. وكان هذا صوت عائشة.
اتصدمت فريدة من رد شوشو عليهم.
علاء اتجه ناحية فريدة: كمان اتجوزتي من ورانا يا هانم؟
علا بضحكة تهكمية: بس واضح إنك أرخص من إنه يعلن جوازكم، إلا في السر. وعرفى بقى؟
هي أغلى عندي من الدنيا، بس واضح إنها رخيصة عندكم. كان هذا صوت مراد: انتو ازاي تتجرؤوا إنكم تهينوها بالشكل ده؟ ومين سمح ليكم تدخلوا بيتي؟
علاء بغل: أنا أخوها يا حضرة، وانت تتجوزها ازاي من غير ما نعرف؟ وقرب من فريدة يمسكها بهدوء من أيديها: يلا يا هانم معانا.
