مراد: أما إكرام، صديق عمري اللي لولاه ما كانتش الشركة وقفت على رجليها تاني، وكسبنا الصفقة اللي بسببها احنا عاملين حفلة النهاردة. وطبعًا صديقي حسن وشريكي في شغلي اللي برا، وصاحب الفضل بنجاح شغلي اللي برا، الباشمهندس أسر ابن حسن صديقي. وطبعًا أغلى إنسانة عندي هي بنتي عائشة، اللي كنت لما بشوفها كانت بتمنحني الإرادة القوية.
وأنا مش عايز أطول عليكم، بس أنا مديون لشخص تاني خالص، وبره عائلتي، لكن من وقت ما دخل بيتي بقى فرد منها، وهي الآنسة فريدة.
وشاور ليها: تطلع جمبه.
طلعت وهي مكسوفة.
مراد: الإنسانة دي أكتر واحدة وقفت جمبي في محنتي، سابت كل حياتها وفضلت جمبي. أول مرة أشوف إنسانة بالتفاني التام، بس واجبها المهني وضميرها هما اللي حركوها، وسهرت جمبي كتير، وتحملت مني أكتر. وهقولكم على سر: هي صاحبة الفكرة إني أعمل الحفلة، وأصرت إني أعزم من أصغر موظف في الشركة لأكبر واحد. هي الآنسة فريدة.
كله قام بالتصفيق، وهي كانت مكسوفة جدًا، وطبعًا كانت الصحافة والإعلام بيصوروا.
وكان في شخص موجود اتصدم أول ما شاف فريدة وقال لنفسه: معقول بعد السنين ده كلها أشوفك هنا؟
أما عائشة فكانت في أقصى درجات غضبها، ولحظت ده حنان، راحت ليها: شوشو، مالك؟ في إيه؟
شوشو بغضب: يعني حضرتك عجبك تصرف دادي؟
حنان: تصرف إيه؟
شوشو: وحضرتك مكنتيش واقفة من شوية لما طلع حتة ممرضة واتكلم عنها ازاي؟
حنان: مراد طول عمره بيحب يشكر أي حد كان ليه فضل عليه.
شوشو نظرت إليها نظرة استنكار: ودي ليها فضل؟
حنان: طبعًا، مش واقفة جمبه لحد ما عدى أزمته؟ وهنا حاولت شوشو تتكلم، لكن حنان كملت: وعارفة قبل ما تتكلمي إن ده شغلها، بس حتى لو كان شغلها، فالواجب إننا نشكرها.
شوشو نظرت ليها نظرة عدم اقتناع وسابتها ومشيت.
انتهت الحفلة وكل مشى ما عدا ضيوف فريدة، فمراد أصر إنهم يباتوا ويمشوا الصبح لأن الوقت اتأخر.
دخلت فريدة مع مراد علشان ياخد علاجه، فمسكها مراد وقرب منها: ممكن أفهم انتي ليه رفضتي إني أعلن خطوبتنا؟
فريدة حاولت تبعد عنه لكن مدهاش فرصة.
مراد: ما تحاوليش، علشان مش هقدر أبعدك عني. فتكلمي كده أحسن.
فريدة: علشان مينفعش. أولًا علشان عائشة، ثانيًا علشان المفروض أقول لأخواتي صح.
مراد: ثانيًا معاكي حق، ولو إني شايف إنهم مش بيسألوا عليكي.
فريدة شعرت بالحزن، فهو معه حق.
لاحظ مراد حزن فريدة فقرب من ايديها وباسها برقة: أنا آسف، مكنش قصدي أضايقك.
فريدة اتكسفت من قرب مراد ليها: ممكن حضرتك تنام علشان عملت مجهود زيادة النهاردة.
مراد: حاضر.
فريدة: تصبح على خير.
مراد: أصبحك على حبك.
أما في منزل حسن.
حسن: ياه كانت حفلة جميلة صح يا حنان؟
حنان سرحانة وغير منتبهة لكلام حسن.
حسن راح ناحيتها: حنان، حنان.
حنان: هه، في إيه؟
حسن: سرحانة في إيه من ساعة ما رجعنا؟
حنان: تفتكر مراد بيحب اللي اسمها فريدة؟
حسن: بصراحة شكي طلع في محله من ساعة ما شوفتهم.
حنان: دي تبقى مصيبة.
حسن: مصيبة ليه؟
حنان: قصت له الحديث اللي دار بينها وبين عائشة.
حسن: متقلقيش، مراد هيتصرف.
أما في صباح يوم جديد في شركة أخوات فريدة، دخل علاء على أخته وهو بيديها جريدة والغضب عامله.
علا: في إيه؟ مالك داخل كده؟
علاء رمى الجريدة على مكتبها: خدي شوفي الفضيحة دي.
علا وهي تاخد الجريدة: فضيحة إيه؟
قرأت علا اللي مكتوب في الجريدة، وكان العنوان: “ياترى إيه سر العلاقة بين رجل الأعمال مراد الحناوي والممرضة؟” وتحت الخبر صورة تجمع بين مراد وفريدة أثناء الحفلة.
علا: يانهار اسود.
علاء: عرفتي؟ داخل مالي الهانم دايره على حل شعرها. احنا لازم نتصرف.
علا: دي فضيحة كبيرة، بس هتصرف.
علاء: اسمها نتصرف.
عدى يومين بعد الحفلة، وكانوا الكل رجع مكان ما جه، توحيدة عند قرايبها والباقي في الدار.
مراد قرر إنه ينزل الشركة أول الأسبوع.
شوشو كل نظراتها لفريدة نظرات كره.
فريدة طلبت من مراد إنها ترجع الدار، بس هو رفض.
في الأوضة عند عائشة كانت بتتكلم في التليفون مع خالد.
شوشو: صدقني يا خالد، مش هينفع، دادي مش هيوافق.
خالد بخبث: ليه يا شوشو؟ مش أنا جيت الحفلة عندكم؟
شوشو: آه، بس دي كانت في الجنينه وكان فيها ناس كتير.
خالد: طب ما دي حفلة، وفيها ناس، وبعدين الشلة كلها موجودة.
شوشو: بس في شقتك.
خالد: طب وفيها إيه؟
شوشو: دادي هيرفض.
خالد: مش لازم تقولي إني الحفلة في البيت. يلا ما تتأخريش وهستناك.
شوشو: هحاول. سلام.
قفل خالد وهو بيبتسم، فخطته ماشية مظبوط، وكلها كام ساعة ويوصل لهدفه.
نزلت شوشو واستأذنت من بابها إنها تروح حفلة عيد ميلاد في النادي، ومراد وافق بس على شرط إنها ما تتأخرش.
طلعت شوشو على أوضتها تفكر تروح ولا لأ، وخصوصًا إن بابها بيثق فيها، وهي أول مرة تكدب عليه. بس حسمت أمرها في النهاية ولبست ونزلت علشان تروح الحفلة، وخرجت من باب الفيلا ركبت عربيتها، ولم تعلم بمن كان يراقبها وراح وراءها.
