عائشة: فاقت، أنا متعودتش آخد أوامر من حد غير دادي.
أسر باستخفاف: دادي؟ أعتقد انت جربتي جزء صغير من غضبي، لو عايزة تشوفيه كله أنا معنديش مانع. كان يقول هذه الكلمات وهو يقترب منها أكثر، مما جعلها تخرج من العربية تجري ناحية الباب، دخلت وهي متنرفزة من هذا الشخص الهمجي كما تسميه، لكن لماذا تسمح له بكل هذه التصرفات؟
دادة سميحة: مالك يا بنتي؟ دخلتي متنرفزة ليه؟
عائشة بنرفزة: أصل في واحد هم…
وقبل أن تكمل كلمتها كان يدخل أسر بهيبته: العشر دقايق عدى منهم دقيقتين، وأنا بحب المواعيد المظبوطة.
جريت عائشة من أمامه وهي بتبرطم ببعض الكلمات: همجي وهو فاكر نفسه مين؟ والله لقول دادي.
اندهشت سميحة من هذا الشخص الذي أجبر عائشة على سمع كلامه: انت مين يا بني؟ وفين مراد بيه؟
أسر: أكيد انت دادة سميحة.
سميحة: أيوه، انت مين؟
أسر: أنا أسر الجندي، ابن حسن الجندي شريك مراد بيه.
سميحة: ياه، انت ابن حسن بيه والست حنان؟
أسر: آه، حضرتك تعرفيهم؟
سميحة: أيوه عز المعرفة، أبوك هو اللي جابني لمراد بيه أشتغل عنده. بس انت عملت إيه في شوشو؟
أسر بضحك: بعدين، اطلعي بعد إذنك ساعديها وقوليلها إن فاضل دقيقتين بس وأنا هستناها في الجنينة بره.
طلعت سميحة فوق تساعد عائشة، وبعد شوية كانت نزلت وهي ترتدي بنطلون جينز وتيشرت أحمر عليه رسوم كرتونية وترفع شعرها على هيئة ديل حصان، وحينما نظر إليها صدم من جمالها، فهي طفلة في نظره لكن جمالها أخاذ.
لاحظت سميحة نظراته لها فابتسمت.
أما عائشة فكانت سعيدة بتلك النظرات، وانتهزت فرصة سرحانه لكي ترد له مقلب من مقالبها، وجاءت في دماغها فكرة عندما لاحظت خرطوم الجنينة موجود على الأرض، ففكرت إنها تشد الخرطوم من تحت رجله. وفعلًا عملت كده: يلا أنا جاهزة.
أسر كان لسه تحت الصدمة: هه؟
عائشة وهي تمشي: يلا هنتأخر.
أسر مازال تحت تأثير الصدمة، وجاء يمشي اتكعبل في الخرطوم وقع على الأرض وهدومه اتبهدلت لأن الأرض كانت لسه مرشوشة مياه وطين.
وجريت من أمامه وهي بتضحك: لسه مجاش اللي يتحدى عائشة الحناوي. وخرجت من باب الفيلا.
أما أسر فكتم غيظه وخرج وراها وهو بيستحلف ليها، وفضل يحاول ينضف في هدومه وركب عربيته وهو كاتم غيظه منها.
عائشة وهي بتبص على منظره وبتكتم ضحكتها: إيه ده؟ انت هتخرج كده؟
أسر وهو بيحاول يرسم الهدوء: ماله؟ كده حلو وتجديد في الشكل.
استغربت عائشة من رد فعله وبرطمت: بارد.
أسر: بتقولي حاجة؟
أما مراد فرجع الشركة واستلم الفاكس ودخل مكتبه، وأول ما قرا الفاكس أخد قرار إنه لازم يرجع مصر ولو بصفة مؤقتة. ونزل تاني ودماغه كلها ازاي هيقدر يقنع عائشة بفكرة الرجوع لمصر ولو حتى لفترة مؤقتة.
بعد شوية كانوا وصلوا المطعم، اتفاجئ مراد من منظر أسر: إيه يا أسر اللي بهدلك كده؟
أسر وهو بيبص على عائشة: أبدًا، واحدة متخدش في بالك، أصل جيت أربي قطة طلعت شرسة، بس متقلقش المرة الجاية هعرف آخد بالي كويس.
مراد: قطة إيه؟ إيه الكلام ده؟
أسر: متشغلش بالك، المهم خير، إيه موضوع الفاكس ده؟
مراد وهو ينظر بجدية: مفيش، أنا قررت إننا ننزل مصر كمان يومين.
عائشة بصدمة: مصر؟ أنا مستحيل أنزل.
مراد: أنا أخدت قرار وببلغك بيه، الكلام انتهى، اتفضلي كلي.
أسر حس إن في حاجة مش طبيعية، وقرر إنه يدخل بس مش دلوقتي، فالحالة اللي فيها مراد متسمحش بجدال، وحس بوجع في قلبه لما شاف دموع في عيون عائشة وخصوصًا في وجوده.
من فترة للتانية فريدة كانت بتتنهد جامد وهي بتبص لمدام زينات وترجع تحكي إيه اللي حصل معاها زمان.
أحوالنا المادية استقرت شوية، وفي يوم كنت قاعدة مع خطيبي.
الخطيب: وبعدين يا فريدة؟ مش أن اللي أوان إننا نتجوز؟
فريدة: انت عارف كويس إن بينا اتفاق إن مفيش جواز قبل تخرج علا وعلاء.
الخطيب بضيق يحاول يخفيه: انتي الموضوع التاني رافضه ليه؟ ده هيساعدنا كتير.
فريدة: تاني الكلام ده؟ انت ازاي عايزني أسيبهم وأسافر؟
الخطيب: يا حبيبتي ده فرصة، دي عقد عمل تبع مستشفى كبيرة في السعودية ومرتب حلو، وهيساعدنا في أول حياتنا.
فريدة: خلاص أنا أخدت قرار.
الخطيب بيحاول يداري غضبه: براحتك، انتي حرة، بس هتندمي بعد كده.
فريدة وهي بتحاول تغير الحوار: احنا هنقضي الخروج في الكلام في الحوار ده؟
الخطيب: لا.
وعدى يومين، وفي يوم كانت فريدة لسه راجعة من نبطشية في المستشفى، وأول ما دخلت لقت علا في وشها وباين عليها الضيق.
فريدة: خير يا علا؟
علا: مفيش.
فريدة وهي تقترب من أختها، فهي تعلم أختها جيدًا حينما تحتاج شيء تمثل الضيق: هاتي من الآخر، عايزة إيه؟ أحسن أنا راجعة مش قادرة أقف على رجلي.
علا: بصراحة في كورس لازم آخده هيفدني أوي في دراستي، وكنت محتاجة فلوس.
فريدة: كام يعني؟
علا: حوالي ألفين جنيه.
فريدة: يا خبر، وأكيد علاء هو كمان؟
علا: آه، بس هو مكسوف منك.
فريدة: متتكسوفوش، سيبوني كده أفكر وأشوف هدبر المبلغ ده ازاي.
علا وهي تقبل خد أختها: ربنا ما يحرمنا منك يا قمر انتي.
فريدة بابتسامة: ولا منكم.
ودخلت علا لعلاء تفرحه.
فريدة: أعمل إيه يا ربي؟ المصاريف زادت أوي، يارب دبرها من عندك.
وفجأة الباب خبط، فريدة وهي بتفتح الباب.
مازالت فريدة تحكي لزينات عن ذكرياتها والضيف غير المتوقع اللي زارهم في الصباح.
الباب خبط عند فريدة، فريدة قالت لنفسها: مين اللي هيجي بدري كده؟ وراحت ناحية الباب تفتحه، وأول ما الباب اتفتح اتفاجئت بآخر شخص ممكن يزورهم.
الشخص: إيه يا فريدة يا بنتي؟ مش هتقولي اتفضل؟
فريدة مازالت مصدومة: بنتك؟
الشخص وهو يدخل إلى داخل الشقة: آه، بنت أخويا يعني بنتي.
فريدة مازالت واقفة مكانها على الباب.
عمها حسني: انتي هتفضلي واقفة كتير؟ مش هتقولي اتفضل اقعد؟
فريدة فاقت من صدمتها على صوته: خير يا حاج حسني.
حسني: حاج حسني؟ أنا عمك.
فريدة بصوت عالي: عمي بأمارة إيه؟ انت جاي هنا ليه وعايز إيه؟
حسني بندم: أنا جاي أرد الحق لصاحبه، أنا ظلمتكم كتير.
فريدة باستهزاء: ظلمتنا؟ بس لا، انت عملت أكتر من كده بمراحل. وفي هذه الأثناء خرج أخواتها على صوت فريدة واتصدموا لما شافوا عمهم، الشخص المفروض إنه يكون حنين معاهم، لكن للأسف كان أكتر شخص ظلمهم.
كملت فريدة والدموع بتنزل من عينيها: انت عارف انت عملت إيه؟ أنت كنت السبب في تعب أمي وبعدين ***ها.
حاول الكلام، لكن فريدة كملت بدموع أكتر وتمر كل ذكرياتهم وآلامهم هما وقبلهم أمهم: أنت لو كنت زمان ادتنا حقنا مكنتش اشتغلت زيادة ولا كان قلبها تعب، وحتى لما تعب وراحت ليك مرحمتهاش، ذلتها وطردتها ورميت لحمك في الشارع، حتى بعد ما ماتت اتصلت بيك علشان تسترها، لكن قفلت في وشي السكة من غير ما تعرف أنا كنت عايزاك في إيه، وسبتنا من غير ما حتى تفكر دول عايشين ولا ميتين، ولو عايشين بيصرفوا منين. كل اللي همك طمعك، ونسيت إن في رب كريم مش بينسى حد من خلقه، وقف لينا جيرانا اللي كانوا لينا ونعمة الأهل والسند، وقفوا معانا لحد ما وصلنا لبر الأمان. أنت جاي ليه دلوقتي وعايز إيه؟ للأسف انت مالكش ولاد أخ هنا، روح دور عليهم في حتة تانية.
حسني بنكسار: خلصتي كلامك؟ وبص ناحية علا وعلاء: كبرتوا أوي.. فاكر آخر مرة شوفتكم كنت لسه عيال صغيرين.
علاء وهو بيحضن فريدة: بفضلها هي بس.
علا: انت عايز إيه؟ وإيه اللي فكرك بينا بعد كل السنين دي؟
فريدة بعصبية: انت لسه هتسأليه؟ اتفضل من غير مطرود.
حسني بحزن على حاله مع ولاد أخوه الوحيد، فكل هذا نتيجة معاملته وطمعه، بس اللي ما يعرفهوش إن ربنا جزاه: أنا جاي وعايز منكم حاجة واحدة، إنكم تسامحوني. انتوا متعرفوش أنا حصلي إيه، وكمان جاي أرجع حقكم.
وعند سماع كلمة حقكم لمعت عيون علا وعلاء بعض الشيء، أما علا ففرحت: مش كنت تقول كده من الأول؟ حقنا كام؟
فريدة بعصبية: علا، انت بتقولي إيه؟
علاء: علا عندها حق، نسمع.
حسني بانكسار: اسمعي كلام أخواتك. أنا بعد ما طمعت في حقكم، المال عماني عن كل حاجة حتى عن ولادي ومراتي. وكمل بدموع: مراتي اللي ماتت بحسرتها على ولادها الاتنين، اللي واحد *** التاني علشان خاطر الفلوس، لما شافوه بيسرقني علشان يجيب السم الهاري المخدرات، اتخانقوا مع بعض وضربوا بسكين. كمل كلامه بسيل دموع والجيران جم على صوتهم، بس للأسف متأخر، لقوا واحد واقع غرقان في دمه وأمه جمبه وقعت من طولها، والتاني خرج جري من البيت بعد ما عمل عمله، والجيران اتصلوا عليا، جايت مفوقتش من الصدمة ولا استوعبت اللي حصل إلا بعد وصولنا المستشفى وخروج الدكتور وهو بيقولي البقاء لله ومراتك جالها شلل من الصدمة. ساعتها فوقت إن كل فلوس الدنيا مش هترجع اللي راح، وبعدها بكام يوم البوليس قبض على ابني التاني واتحكم عليه بالإعدام، وبعدها بكام شهر أمهما ماتت. ساعتها عرفت إن دعوة المظلوم بترد لو بعد زمن. وأنا ظلمتكم، كل اللي أنا طالبه منكم إنكم تسامحوني. وفتح شنطة كانت معاه، وأول ما شافوا اللي في الشنطة اتصدموا.
