الحاج عبد الله: متبصليش كده، أنا هفهمك. بس يا ستي، أنا كلمت الدكتور ممدوح صاحب المستوصف اللي على أول الشارع، إنك تشتغلي عنده بعد المدرسة من الساعة الخامسة لحد الساعة 11 بالليل معاه في المركز، واهو بالمرة تتدربي وتتعلمي. أنا عارف إن كده هيبقى حمل زيادة، بس هتتعلمي ونفس الوقت هتاخدي مبلغ يساعدك على معاش باباكي. إيه رأيك بقى؟
فريدة بفرحة وباست الحاج عبد الله في خده: وده عايزة رأي؟ طبعًا موافقة يا أحلى حاج عبد الله. وقامت تجري من كتر الفرحة.
الحاج عبد الله وهو بيضحك: الله يجازيكي يا فريدة يا بنتي.
طلعت فريدة وهي فرحانة ومبسوطة أوي.
قابلتها توحيدة: نزلت للحاج عبد الله؟
فريدة بفرحة: آه.
توحيدة: ومالك مبسوطة كده ليه؟
فريدة رجعت ملامحها للحزن: أصل بصراحة يا خالتي، الحاج عبد الله حل ليه مشكلة.
توحيدة: والحمد لله، وافقتى؟
فريدة باستغراب: يعني كنتي عارفة؟
توحيدة: طبعًا، دي أنا صاحبة الفكرة، ومتخافيش على أخواتك في عيني وقت الشغل، متقلقيش.
فريدة وعينيها تفيض بدموع: ربنا يخليكم ليه.
توحيدة وهي تحضنها: مش عايزة أشوف في عينيكي دموع تاني، ادخلي يلا لأخواتك، واعملي حسابك بكرة الصبح تروحي مع الحاج عبد الله تسحبي أوراقك وتقديمها في مدرسة التمريض، علشان خلاص مفيش وقت.
فريدة: حاضر.
دخلت فريدة على أخواتها، شافت علاء أخوها بيعيط، جريت عليه: مالك يا علاء؟
علاء وهو بيمسح دموعه: مفيش حاجة، بس افتكرت بابا وماما.
فريدة وهي بتحضن أخوها: الله يرحمهم.
علا: على فكرة علاء بيكذب.
علاء: بس يا علا.
فريدة وهي بتبص لعلاء: في إيه؟
علا: أصل بصراحة علاء زعلان علشان هيطلع من المدرسة ويشتغل ويصرف علينا.
فريدة: الكلام ده بجد؟
علاء اكتفى يهز رأسه دليل على الموافقة.
فريدة: مفيش حاجة من كل ده هيحصل.
علاء: ازاي والمصاريف؟
فريدة: خالتي توحيدة والحاج عبد الله حلوها. وحكت ليهم على الكلام.
علاء: بس كده مش هيبقى تعب عليكي؟
فريدة بحب: لا يا حبيبي، وبعدين متنساش إني أختك الكبيرة.
علاء: بس أنا الراجل.
فريدة بضحك: طبعًا.
علا: خلاص يا علاء.
وتاني يوم الصبح راحت فريدة مع الحاج عبد الله وخلصت كل الإجراءات، حتى إجراءات المعاش. وعدى شهر كان خلاله فريدة نزلت مع الدكتور ممدوح وكانت نابيهة جدًا واتعلمت بسرعة. وجاءت الدراسة، وفريدة كانت بتروح المدرسة الصبح وترجع بسرعة تحضر لأخواتها الغداء وتذاكر شوية ليهم وليها، وبعد كده تنزل تروح المركز، وتوحيدة كانت بتقعد مع أخواتها في حالة عدم وجودها. وعدت السنة الأولى ونجحوا هما التلاتة بتفوق، وفريدة كل يوم بتثبت لنفسها إنها قد المسؤولية. وعدى سنتين وفريدة اتخرجت من المدرسة واتعينت في مستشفى حكومي، وبعد الضهر كانت بتروح المركز. وأصرت إن أخواتها يدخلوا الثانوية العامة، وده كانت وصية أمها، بس كانت مصاريف زيادة عليها، وده خلاها تروح كمان تمرض المرضى في بيوتهم علشان تكسب فلوس أكتر، لحد ما خلصوا أخواتها الثانوية ودخلوا كلية الهندسة، وكانت فرحانة كأنهم ولادها مش أخواتها. وكانت كل ما تعدي بيهم مرحلة تروح تزور قبر أبوها وأمها وتقعد تحكلهم عن كل حاجة مفرحها أو محزنها كأنهم عايشين معهم لحظة بلحظة. لحد ما جاء يوم وشافها فيه أخو واحدة زميلاتها، أعجب بيها وهي كمان، بس كانت خايفة على أخواتها، وحكت لتوحيدة اللي أصرت إنه يتقدم رسمي، علشان ده حقك يا بنتي. وفعلًا تم خطوبتهم، بس فريدة أصرت إن مفيش فرح إلا بعد أخواتها ما يتخرجوا من الجامعة ويشتغلوا، وفعلًا وافق على كده لأنه كان فريدة عاجبه، وكانت كل فلوسها ضايعة على طلبات أخواتها. وفي يوم طلبت منها ست توحيدة إنها تدخل معها جمعية علشان تحوش وتجيب لها طلبات الجواز، لكن فريدة رفضت علشان أخواتها ومصاريفهم، فكانت علا وعلاء كثرين الطلبات مش حاسين بمدى معاناة أختهم في جمع الفلوس ليهم وطلباتهم اللي مش بتخلص.
أما في شركة مراد الحناوي في وقتنا الحاضر، بعد ما أصر على عزومة أسر معاهم على الغداء، خرجوا على مكتب مادلين لأخذ عائشة معهم.
مراد بجدية: مادلين، أنا همشي دلوقتي ومش راجع تاني، في حاجة مهمة.
مادلين: لا مستر مراد، بس أحب أفكر حضرتك بمقابلة مستر جورج بكرة.
مراد: تمام.
وفي هذه الأثناء كانت شوشو وأسر، كلًا منهم ينظر إلى الآخر نظرات نارية كأنه إعلان لحروب لا تنتهي. وفاق هما الاثنين على صوت مراد وهو بيقول يلا.
نزلوا مع بعض، لكن مراد تليفونه رن، وكانت مادلين بتقوله إن في فاكس مهم جه من مصر لازم يشوفه دلوقتي، مينفعش يتأجل لبكرة. فلف مراد لثنائي اللي واقف كل واحد متحفز لتاني.
أسر: معلش، ممكن تاخد عائشة على البيت.
عائشة باستغراب: ليه يا دادي؟ احنا مش المفروض نتغداء بره.
مراد: أيوه يا حبيبتي، بس كنا هنروح البيت الأول علشان تغيري هدوم الألعاب ده، وبعد كده نخرج.
عائشة بتأفف: بس يا دادي.
مراد بحزم: مفيش بس، يلا. ووجه كلامه لأسر: يلا، وأنا هطلع أشوف إيه حكاية الفاكس، وانت خد عائشة على البيت تغير الزفت اللي هي لبساه ده، وبعدين روح على مطعم… في ترابيزة محجوزة باسمي.
أسر: هو في مشكلة؟
مراد: لا، بس في فاكس مهم لازم أشوفه، يلا مش هتأخر.
وطلع مراد على الشركة مرة تانية.
أسر ضحك بمكر، فهي فرصته للانتقام من تلك المغرورة، فقرر يستفزها: يلا يا آنسة عائشة.
عائشة بغضب: يلا على فين؟ وبعدين أنا اسمي شوشو.
أسر باستفزاز: يلا، كلمة واحدة يا عائشة.
عائشة بغضب أكبر وهي ترفع صوابعها أمامه: لآخر مرة أنا اسمي شوشو، وركوبي معاك لا. وجاءت تسيبه ومشيت وتوقف تاكسي لأنها سابت عربيتها في الفيلا. وقبل ما تمشي وجدت من يمسك معصمها بشدة وينظر لها نظرات نارية: أنا قولت هتركبى معايا، واول واخر مرة أبقى بكلمك وصوتك يعلى وتمشى قبل ما أسمحلك تمشى. وشده مرة واحدة ناحيته وركبها العربية وطلع بسرعة جنونية، وكل ده تحت نظرات شوشو المصدومة من هذا الشخص الهمجي. ظلت تحت تأثير الصدمة حتى وصلت إلى الفيلا، وفاقت على صوته هو بيقول: وصلنا، هتدخلي تغيري الزفت اللي انتي لبساه ده في عشر دقايق، مفهوم؟
