فريدة: طيب براحة.
قربت علا من أمها تبوسها حاسة بجسمها ساقع: فريدة، ماما ساقعاني أوي، تعالى شوفيها كده.
فريدة بخضة: وريني كده.
قربت فريدة من أمها، شافت جسمها متلج وأبيض، وحاولت تهزها: ماما، ماما، رد عليا، متسبنيش يا ماما.
دموعها نزلت منها وفضلت تحضن في مامتها وتهز فيها شوية، وعلا وعلاء بدأ صوت عياطهم يوصل للجيران اللي جم على صوتها.
توحيدة بتخبط على الباب: افتحي يا فريدة، افتحي يا بنتي.
جرى علاء فتح الباب وهو بيعيط: الحقى ماما يا خالتي، نايمة مش بترد علينا.
توحيدة بحزن: لا حول ولا قوة إلا بالله، بس يا بني اهدي.
دخلت توحيدة لقيت فريدة نايمة في حضن أمها وهي بتعيط وجمبها علا: إيه اللي حصل يا بنتي؟
فريدة بدموع: ماما سبتنا يا خالتي، خلاص مباقش لينا حد.
توحيدة قربت منهما وشافت أمها اللي وشها ابيض، بس سبحان الله كانت مبتسمة.
توحيدة بدموع: لا إله إلا الله، قومي يا بنتي حرام عليكي كده. وشدت علاء وأخدتها في حضنها وفريدة كمان، وغطت وش أمها وخرجت بيهم، كان باقي الجيران اتجمعوا وعرفوا بالخبر.
الحاج عبد الله صاحب محل تحت البيت: إكرام الميت دفنه يا ست توحيدة.
توحيدة: عندك حق يا حاج، قومي يا فريدة يا بنتي، تعالى معايا نكلم عمك علشان دي الأصول.
فريدة مشيت مع توحيدة وهي مش حاسة بحاجة. كلمت عمها في تليفونه اللي قفل السكة في وشهم من قبل حتى ما تتكلم، مجرد معرف إنها بنت أخوه. رجعت فريدة على شقتهم هي وتوحيدة وحاسة كأن الدنيا وقفت بيهم.
قرب منهم الحاج عبد الله: إيه يا بنتي؟ كلمتي عمك؟
فريدة مردتش واكتفت بدموعها.
توحيدة وهي صعبانة عليها: الراجل الدون قفل في وشها السكة من غير ما يعرف هي كانت عايزة إيه.
الحاج عبد الله صعبان عليه حالهم: احنا هنتكفل بكل حاجة، الجيران لبعضيهم، يلا يا توحيدة كلمي المغسلة تجي تشوف شغلها.
توحيدة كلمت الست، جاءت، والحاج عبد الله راح مكتب الصحة وخلص كل الإجراءات. فريدة أصرت إنها تقف على غسل أمها وهي اللي تغسلها.
الست المغسلة: هتعرفي يا بنتي؟
فريدة اكتفت بهزة رأسها بالموافقة.
وغسلت مامتها وخرجت من جوه الأوضة كأنها كبرت عشرين سنة، وقبل ما تغطى وشها لآخر مرة قربت منها وحضنتها وميلت على ودانها: أوعدك يا أمي إني أحقق كل حاجة، وأخواتي من النهاردة ولادي مش أخواتي.
وتمت مراسم الدفن في مقابر تبع الحاج عبد الله، وقفت الحاجة توحيدة معهم في الجنازة والعزاء، ووقفت فريدة مع توحيدة كأنها ست كبيرة. وخلاص العزاء، وراحت الست توحيدة حضرت ليهم العشاء وجاءت، لكن فريدة رفضت تاكل، بس اكلت أخواتها ونيمتهم.
توحيدة: شيلي أختك وأنا هشيل أخوكي، وتعالوا باتوا عندي.
فريدة كانت أول مرة تخرج من صمتها: لا يا خالتي، احنا من النهاردة مالناش غير بعض ومش هنفترق تاني.
توحيدة: طب أنا هنام معاكم.
فريدة: مالهوش لزوم يا خالتي، احنا لازم نتعود على حياتنا الجديدة.
بعد كلام كتير أصرت فريدة على موقفها، وطلبت منها توحيدة لو احتاجت حاجة تخبط عليها.
دخلت فريدة أخواتها يناموا، وهي دخلت أوضة أمها ونامت على السرير وحضنت هدومها، ودموعها نزلت لحد ما نامت، وحلمت ساعتها بأمها إنها خفت وفرحانة وكانت مع بابها، فرحت فريدة وقلبها ارتاح إن أمها ارتاحت، وصحيت من النوم على صوت عياط علا، اخدتها في حضنها: مالك يا علا؟
علا بدموع: ماما خلاص سبتني ومش هشوفها تاني زي بابا.
فريدة تحضنها: ماما كانت تعبانة وهي دلوقتي ارتاحت، وبعدين كل ما توحشك اقري قرآن، مش إنتي حافظة أجزاء من القرآن؟
علا تمسح دموعها: آه.
فريدة: يبقى خلاص، كل ما توحشك اقري قرآن وادعيلها، يلا بقى نحضر الفطار علشان علاء.
عدت الأيام، وفريدة وأخواتها اتعودوا على حياتهم، وتوحيدة والحاج عبد الله كانوا بيساعدوهم. وفي يوم نزلت توحيدة للحاج عبد الله تفاتحوا في موضوع.
الحاج عبد الله: خير يا توحيدة؟
توحيدة: خير يا حاج، بإذن الله أنا بصراحة عايزة آخد رأيك في حاجة. وحكت توحيدة للحاج عبد الله اللي عاوزة.
عبد الله: عندك حق، سيبيلي الموضوع ده وأنا أتصرف فيه.
توحيدة: خلاص هقوم أنا.
عبد الله: طب نادي على فريدة، عايزها.
توحيدة: حاضر.
طلعت توحيدة وخبطت على فريدة وطلبت منها تنزل للحاج عبد الله.
نزلت فريدة للحاج: خير؟
عبد الله: خير يا بنتي، ناوية على إيه؟
فريدة بتعجب: في إيه؟
عبد الله: في موضوع تعليمك انتي وأخواتك.
فريدة بقلة حيلة: أنا هخرج من المدرسة وهحاول أشتغل وأصرف على أخواتي.
عبد الله: ليه يا بنتي تخرجي من المدرسة؟
فريدة: نصيب بقى.
الحاج عبد الله: أنا بقى عندي الحل.
زينات قطعت ذكريات فريدة: وإيه بقى كان الحل يا فريدة؟
فريدة اتنهدت جامد: لولا الحاج عبد الله والحاجة توحيدة حياتي كانت ممكن تبقا مستحيلة، وساعدوني كتير. هقولك يا مدام زينات. وترجع تاني فريدة لذكرياتها.
الحاج عبد الله: أنا عندي حل ليكي.
فريدة بأمل: حل إيه؟
أما عند مراد الحناوي في وقتنا الحاضر، خلص شغل مع أسر.
أسر بجدية: بس كده احنا هنضرب ضربة هنوقع ناس كتير فيها.
مراد وهو بيرجع للوراء: لازم علشان أعرف أخرج من دايرتهم من غير مشاكل.
أسر: بس هما مش هيسكتوا، أنت كده بتقفلها عليهم.
مراد وهو بيقوم من على المكتب: أنا فكرت وخلاص قررت، لازم أحمي عائشة، دي كانت وصية أمها إني أحافظ عليها.
أسر: أكيد ما هي بنتك الوحيدة.
مراد: ولازم آمن مستقبلها كويس. وبعدين قام من على الكرسي: كفاية كلام في الشغل، ويلا بينا علشان نتغدا سوا.
أسر: لا حضرتك روح أنت.
مراد: أنا قولت كلمة.
زينات قطعت ذكريات فريدة: وإيه بقى كان الحل يا فريدة؟
فريدة اتنهدت جامد: لولا الحاج عبد الله والحاجة توحيدة حياتي كانت ممكن تبقا مستحيلة، وساعدوني كتير. هقولك يا مدام زينات. وترجع تاني فريدة لذكرياتها.
الحاج عبد الله: أنا عندي حل ليكي.
فريدة بأمل: حل إيه؟
فريدة كانت أمنيتها تكمل دراستها وتدخل كلية الطب وتساعد في تخفيف آلام الناس.
الحاج عبد الله: إيه رأيك لو دخلتي مدرسة التمريض وتبقى كده حققتي حلمك؟ وكمل بضحكة للتخفيف عنها: وعلى فكرة التمريض أهم من الدكتور، إيه رأيك؟
فريدة وهي بتضحك رغم عنها: بس حضرتك عارف مصاريف، ومعاش بابا يدوبك كان بيكفينا بالعافية، خلاص ماليش نصيب.
الحاج عبد الله: اسمعيني بس، أنا عايز أعرف رأيك بس، وبعدين سيبي موضوع المصاريف دي عليا.
فريدة بفرحة ممزوجة بدموع، فالشخص المفروض يقف جمبهم يرفض وجودهم، والغريب بيفكر في مساعدتهم، فاقت من سرحانها على صوت الحاج عبد الله: إيه يا بنتي؟ روحي فين؟
فريدة: معاك، بس ذنب حضرتك إيه إنك تتحمل مصاريف زيادة؟ وأنا عمري ما أقبل إن حد يصرف عليا أنا وأخواتي ونكون عالة على حد.
الحاج عبد الله بضحك: كبرتي يا فريدة، أولًا انت اللي هتصرفي على أخواتك وعلى نفسك، مش هتكوني عالة على حد.
فريدة بصت له باستغراب: ازاي؟
