لا تنكر أنها كانت تعشق عماد، فقد تنازلت عن تعليمها فقط لتتفرغ له وتهتم به، وكم ندمت على تلك الخطوة التي فعلتها بحق نفسها.
تنازل تلاه آخر حتى أصبحت تضحياتها بلا معنى، وكأنها حق مكتسب!!!
انتهت مراسم العزاء وتفرق الجميع، الصمت المميت يعم المكان، ووجع القلوب يشق السكون.
في هذا الوقت كان شعيب في الغرفة الخاصة به وبزهرة، يتطلع لصورة زفافهم المعلقة على أحد الحوائط.
يتفحص ملامحها بتمهل دون كلل، كم كانت سعيدة، وكم كانت مبهرة في ذلك الفستان الأبيض، كقلبها، نظراتها كانت مليئة بالحب الجارف والسعادة المطلقة.
اقترب يتلمس صورتها بألم قائلًا بتأثر وصوت متحشرج: فرقتيني بدري أووي يا زهرتي، في حاجات كتيرة معشنهاش مع بعض، أنا محتاجك وبناتنا محتاجينك.
صمت يبتلع غصة بكاء تخنقه: تخيلي، مش قادر أواجه بناتنا! مش عارف هجاوب على أسئلتهم أزاي لما يقولولي مامي فين؟ هرد بإيه؟ وهعوض وجودك اللي مستحيل يتعوض أزاي؟
صمت قليلًا ينظر لهاتفه، يتابع مشهد الواقعة المروع، فقد كانت زهرة خارجة من إحدى العيادات النسائية، تبدو سعيدة متألقة، تخطو أولى خطواتها لعبور الطريق للوصول إلى سيارتها، وقبل أن تنتهي من العبور ظهر من العدم مركبة نقل كبيرة اصطدمت بها بقسوة، فسقطت زهرة وتناثرت أوراقها واختفت المركبة!!
أكمل بوعيد وعيون لامعة: بس وحياتك عندي، اللي كان السبب في أننا نتحرم منك هجيبه، ولو كان آخر حاجة هعملها في حياتي هجيبه، وهندمه على اليوم اللي اتولد فيه.
انتبه لصوت بكاء مكتوم في الخارج، فتوقفت عضلة قلبه قلقًا، وهرع يطمئن على بناته، فقد تركهم نائمين، ولكنه صدم حين رأى ابنته الكبرى عائشة تبكي بكاءً مكتومًا، وجهها الملاكئي غارق في الدموع، تضع يدها الصغيرة على فمها، تحاول بألم كتم شهقاتها، ابتلع غصة مسننة وعيناه تلسعها دموع ملحة تفرض وجودها.
اقترب ببطء يتلمس شعرها الذهبي قائلًا بحنان: قلب بابي بيتعيط ليه؟
رفعت عيناها البريئتان وهمست ببكاء: مامي غابت يا بابي، غابت ومش هشوفها تاني!!
ثم انهارت في البكاء.
بتحشرج: مامي دلوقتي في مكان أجمل وأحسن كتير من هنا، صحيح مش هنقدر نشوفها، بس هي بتشوفنا وتسمعنا، وأكيد هي زعلانة وهي شايفة حبات اللؤلؤ اللي نازلة من عيونك، أنت عايزة مامي تبقى سعيدة ولا تزعل عشان أنت حزينة؟
أومأت برأسها نافية، هاتفة بحزن: عايزاها سعيدة، بس مش قادرة أتخيل أن مش هشوفها تاني، مامي طيبة أوي يا بابي، ليه تغيب وتسبنا؟ أحنا هنا بنحبها، أنا وأنت وملك وتيتا وجدو، كلنا بنحبها، كلناا، ليه تغيب يا بابي، لييه!!
اعتصر عيناه بعنف، شاعرًا برغبة ملحة في البكاء، ولكنه قال بتأثر: قضاء الله يا قلب بابي، كلنا هيجي يوم ونروح عند ربنا، وبإذن الله نكون في الجنة، مش أنت عارفة قد إيه الجنة حلوة وفيها كل حاجة بنحبها.
عائشة: أيوه، مامي قالتلي قد إيه الجنة حلوة، وأن اللي بيعمل خير ويصلي بيدخلها.
شعيب: أهي مامي سبقتنا على هناك، وهي أكيد حابة تشوفك مبسوطة، فأمسحي عيونك الحلوين دول وتعالي نصلي وندعي لمامي.
بعد مرور ثلاثة أشهر
ها هي الأيام تمضي والجروح تندمل، فالوقت كفيل بكل شيء.
كعادتها مؤخرًا ولمدة ثلاثة أشهر وقفت في الصباح الباكر لإعداد وجبة الإفطار لشعيب وبناته.
تريد الفوز به، فقد زالت عقبتها وأصبحت الساحة لها وحدها!!
زوجها وقد توفي، وها هي زوجته قد لحقت به، فحانت اللحظة التي تظفر به!!
أغمضت عينيها تتخيل بأنها أصبحت زوجته، ينظر إليها.
همست اسمه وكأنها تتذوقه: شعيب.
بتتلولي زي الحية كده ليه يا مقصوفة الرقبة!
شهقت نورا بفزع من صوت والدتها، ونظرت لها بغضب: في حد يدخل كده؟ خضتيني يا ماما.
وفاء بسخرية: سلامتك من الخضة يا قلب ماما.
وأكملت باستنكار: مقولتليش كنتي بتتلوي كده ليه؟
نورا بارتباك: أصل، أصل اتلسعت وأنا بحضر الفطار لشعيب.
وفاء بوجوم: شعيب! وفطار!! مش ملاحظة أن اللي بتعمليه ده مش طبيعي؟ شعيب وعنده أمه وأخته، ربنا يباركله فيهم ويقدروا يساعدوه في كل حاجة، أنت إيه دخلك بيه؟ تحضريلوا كل يوم الفطار بتاع أيه؟ خلي بالك من وضعك ووضعه.
نورا بحنق: مالوا وضعنا إن شاء الله.
وفاء بغضب: أنتوا الاتنين أرامل.
ياهانم، ومينفعش كل يوم تطلعيله فطاره الساعة 7 الصبح والكل نايم!! وإن كان عرق الحنية ناقح عليكي أوي، كلي مالك ابنك اللي من وقت ما اتولد عمرك ما أكلتيه، صحيح باب النجار مخلع.
نظرت لوالدتها ببرود، متعمدة عدم الرد عليها، وحملت الطعام متجهة إلى طابق شعيب.
في ذات الوقت في طابق شعيب
وقف شعيب في حيرة من أمره، ينظر لشعر ابنته بتركيز شديد قائلًا بجدية: عيوش، شعرك دا فيه حاجة مش طبيعية.
ردت عائشة بحيرة طفولية: مالو يا بابي؟ ماهو حلو أهو.
شعيب بتركيز: حلو أه، بس بيطول كل يوم، هو ده معقول!!!
شهقت بطفولية ضاحكة: بجد!! يعني شعري زي شعر روبانزل.
شعيب باستنكار: روبانزل مين؟ حد نعرفه!!
ضحكت عائشة ببراءة قائلة بتوضيح: لا يا بابي، روبانزل دي في الكرتون اللي بتفرج عليه، شعرها طويل وبيلمع زي الدهب، عندها شعر سحري، بص لما أرجع من المدرسة هخليك تتفرج على فيلم روبانزل، موافق؟
شعيب بحنان: موافق طبعًا، فين بقى بوسة بابي؟
انتبه لوجود ملك تقلب شفتيها بتذمر، تنظر له بغضب.
شعيب: لوكا، تعالي يا حبيبتي، واقفة بعيد ليه؟
ملك باتهام: أنت بتحب عائشة أكتر مني.
أومأ بالنفي وهو يجلسها على قدمه: لا طبعًا، أنا بحبك أنت وهي قد بعض.
ملك بفرح: بجد.
شعيب بتأكيد: بجد طبعًا، وأكمل بهمس مسموع لعائشة: بس بحبك أنت زيادة شوية، أوعي تقولي لعائشة، دا سر بينا، أتفقنا؟
اتسعت عيناها ببراءة هاتفة بحماس: أتفقنا.
نظر شعيب لابنته الكبرى يغمز بأحد عينيه، فضحكت عائشة بمرح.
انتبه لجرس الباب، فقام يفتحه بهدوء.
نورا بابتسامة مشرقة: صباح الخير يا شعيب، حضرتلك فطارك أنت والبنات.
شعيب بهدوء: صباح الخير يا نورا، تسلم أيدك، تعبناك الفترة اللي فاتت، بس من النهاردة هناكل مع والدتي، فمفيش داعي تتعبي نفسك، أكيد بتكوني مشغولة مع مالك.
شحبت ابتسامتها، وودت لو ترى زوجة عمها حنان فتفرغ بها غضبها وإحباطها، فقد خسرت فرصة ذهبية للتقرب من شعيب!
ولكنها قالت بابتسامة زائفة: أه طبعًا، مالك واخد كل وقتي، أنت عارف باباه غاب والحمل كله عليا.
شعيب: ربنا معاكي، هستأذن، أنا لازم أوصل البنات للمدرسة.
جلد الذات!
هذا ما تفعله.
لمدة ثلاثة أشهر تجلد ذاتها، تعنفها، تحاسبها على ما ارتكبته في حق ذاتها!
منذ غياب زهرة وهي حبيسة غرفتها، ولكن تلك المرة حبس اختياري، انعزلت عن الجميع، لا ترغب برأي أحد.
حتى الطعام رفضته، تأكل ما يجعلها حية لليوم بضع لقيمات لا أكثر.
كانت تظن أن بطلاقها سينمحي عماد من حياتها، ولكن كم كانت مخطئة.
فإن كانت لا تراه وجهًا لوجه، ولا تسمع صوته المقزز، ولكن تقرأ كلماته ورسائله التي يرسلها لها.
ليست رسائل عشق وغرام، ولا رسائل ندم واشتياق، ولكن رسائل سب وتهديد وترهيب، يتوعد لها بالكثير، ويقسم بأنه سيسقيها الألم كأسًا وراء كأس حتى يفنى جسدها وتصعد روحها لبارئها.
انتبهت للصوت المنبعث من هاتفها بوصول رسالة على أحد مواقع التواصل الاجتماعي.
أخذت تنظر للهاتف بعيون باهتة متورمة من كثرة البكاء، متحيرة بين قراءة الرسالة أو تجاهلها.
ولكن شعورها بالغضب من نفسها بأنها أحبت شخصًا كعماد جعلها تقبض على الهاتف، تكتب كلمة السر، تفتح الرسالة، وليتها لم تفعل!!
في أقصى توقعاتها لم تتخيل أن يصل إلى هذا الحد من الوضاعة والقذارة!!
صرخت بنفور، ترمي الهاتف بعنف، فأصبح أشلاء صغيرة مثل قلبها!!
على أثر تلك الصرخة انتفضت فوزية تهرع لغرفة لتين تطمئن عليها، فتخشبت من منظر لتين المزري!!
بداية من شعرها المبعثر في كل اتجاه، وجهها شديد الاصفرار، عينيها حمراء كالدم.
اقتربت تقول بفزع: بسم الله الرحمن الرحيم، مالك يا بنتي؟ حصلك إيه؟
لتين بصراخ هستيري: محدش ليه دعوة بيا، سبوني لوحدي.
فوزية ببكاء: اهدي يا لتين، اهدي يا حبيبتي، متحرقيش قلبي عليك، كفاية وجعي على أختك.
لتين بغضب: قولت برة، سبيني لوحدي، مش عايزة حد، أنا بكرهكوا، سامعة، بكرهكوا.
استيقظ حسان نور الدين على أصوات عالية بشكل مستفز، يحاول التغلب على تلك الأصوات والعودة إلى النوم، ولكن مع تزايد الأصوات حدة وارتفاع، استطاع تمييز صوت ابنته لتين!!
انتفض بعنف يهرع إلى غرفتها يصيح منفعلًا: إيه اللي بيحصل هنا بالظبط؟
