نظرت لتين بكره شديد لوالدها صائحة بغضب: خد مراتك واطلع بره.
حسان صارخًا بغضب: لتين، احترمي نفسك، أنت بتتكلمي مع أبوك، أنت أزاي تتكلمي بالطريقة دي، ليه؟
شهقت فوزية برعب وهي ترى تشنج جسد لتين بصورة غير طبيعية.
تكلمت لتين بصوت غريب: ليه حق!!
تطلعت في والدها بصدمة: أنت شايف أن ليه حق يا بابا!!!
توتر حسان للحظات وزاغت عيناه، ولكن بالأخير قال بثبات زائف: أيوه ليه حق، إذا كان بتتكلمي معايا أنا أبوك بالشكل ده، فبتتعاملي معاه أزاي؟ مش تحمدي ربنا إنه استحملك كل السنين اللي فاتت من غير ما تخلفي، راجل غيره كان رماكي ولا سأل عنك أو على الأقل يتجوز عليك.
شهقت لتين وكأنها تختنق، لا تستطيع التنفس، وارتاع فمها بقهر، وقد طعنتها كلمات والدها بخنجر مسموم.
همست بصوت مخنوق ينبثق منه القهر والألم: مش عدل اللي حصل فيا واللي لسه بيحصل معايا، مش عدل أبدًا، هو معندوش حق يعمل فيا كده، مفيش مخلوق ليه الحق يعمل فيا كده، حتى أنت يا بابا!!
صحيح أنت عمرك ما أسأت لي ولا قولتلي كلمة تزعلني، بس عملت حاجة عمري ما هسامحك عليها، رجعتني ليه مرة بعد مرة بعد مرة، لحد ما بقى مش عامل ليك ولا ليا حساب، ولا خاطر جدي، مفكر أن عماد أساء لي مرة واحدة زمان والمرادي التانية؟ لأن محدش قاله اللي بيتعمل فيا.
صمتت تنظر لعين والدها مباشرة قائلة بعذاب: بس أنت كنت عارف، عارف وساكت، ومش بس كده، كنت بتتحايل عليه إنه يجي ياخدني من عندك!!! ليه يا بابا، ليييه؟ دا أنا كل مرة كنت بجيلك مضروبة، والإساءة باينة على وشي وجسمي، بجيلك أتحامى فيك، بس كل مرة كنت بتخذلني!!! كل مرة أدعي ربنا من كل قلبي إنك متكسرش بخاطري وتجبلي حقي منه!! تصدق شعوري وأنت بتتخلى عني كان أقسى وأوجع من إساءته وأهانته ليا!!
توجهت بأنظارها لفوزية المنهارة في البكاء على حال ابنتها.
وأكملت باتهام وخيبة أمل: حتى أنت تخليتي عني! دايما واقفة في صف عماد! مش مهم يعمل إيه فيا، المهم إنه ميطلقنيش، المهم أفضل على ذمته، يضربني بقى أو حتى يموتني، كل ده مش مهم، المهم أفضل معاه، ماهو صحيح مين هيرضى بواحدة معيوبة زيي!! أرض بور على رأيه!!
عارفة المشكلة الأكبر إيه؟ أن لما زهرة الله يرحمها تزعل من شعيب لأي سبب، مع أن نادر لما تزعل منه كنت بتقومي بدور الحماة مظبوط، وعلى أكمل وجه، كنت دايما تدافعي عنها حتى لو هي غلطانة!!
ياريت كنت أنا اللي غبت وزهرة عاشت، على الأقل كانت بقت مع بناتها!!
