تاني يوم، خدنا بعض وروحنا المطعم، الست كانت قاعدة مستنيانا، أول ما شافت بنتي قامت ووقعت، بنتي جريت عليها وحضنتها، والاتنين فضلوا يعيطوا.
أنا واقفة بتفرج على بنتي بتحضن أمها اللي أول مرة تشوفها، وجوزي حاطط إيده على صدره مكان التاتو، وبيعيط.
ومن ساعتها، بقينا عيلة غريبة، عيلة فيها أب وأمين، وبنت عندها وحمة بنفسجي ورا ودانها زي وردة أمها، وبنت عرفت انها كانت محبوبة من أول لحظة، مش متسابة، محبوبة من اتنين ستات، واحدة اديتها الحياة وواحدة اديتها الحب.
تاني يوم بعد ما حضنوا بعض في المطعم، روحنا كلنا البيت، البيت اللي أنا وجوزي وبنتنا عايشين فيه بقالنا 12 سنة، لأول مرة يدخله حد رابع.
البنت كانت ماسكة إيد أمها الحقيقية ومش عايزة تسيبها، وأمها الحقيقية ماشية جنبها كأنها ماشية على بيض، خاېفة تمسكها جامد توجعها، وخاېفة تسيبها تمشي لوحدها.
أول ما دخلنا الشقة، بنتي دخلت أوضتها وطلعت علبة كبيرة، علبة الذكريات اللي كنت أنا عاملاهالها من وهي صغيرة، فيها أول سنة لبستها، أول خصلة شعر قصيناها، أول كراسة كتبت فيها اسمها، وصورها وهي بتكبر سنة ورا سنة.
فتحتها قدام أمها وقالت لها شوفي، دي أنا وانا عندي سنة، ماما كانت بتأكلني
أمها الحقيقية قاعدة بتعيط وتضحك في نفس الوقت، تقول شبهي وانتي صغيرة، نفس المناخير ونفس الضحكة
أنا واقفة في المطبخ بعمل شاي وإيدي بتترعش، وجوزي واقف ورايا ساند على الحيطة وبيقول سامحيني
قلت له مش وقت كلام دلوقتي، البنت وأمها جوا، سيبهم ياخدوا وقتهم
قال انتي زعلانة اني خبيت؟
قلت له أنا زعلانة انك شلتني لوحدي 12 سنة في كدبة، كنت فاكرة اني مش بخلف وأن ربنا عوضني ببنت، وطلعت البنت ليها أب وأم وعيلة، وانت شايفني كل يوم وانا بقولها انتي هدية من ربنا وبتسكت
سكت، وبعدين قال كنت خاېف تقولي لا، خاېف تقولي مش عايزة أربي بنت جوزي من واحدة تانية، كنت خاېف من الخسارة
قلت له وانت فكرت فيا ولا فكرت في نفسك؟ أنا عمري ما كنت هقول لا، أنا كنت أتمنى عيل، كنت هربيها حتى لو كانت بنت مين، بس كنت عايزة أعرف الحقيقة
دخلنا الصالة، لقينا أمها الحقيقية مطلعة الجوابات، ال 12 جواب اللي كانت بتكتبهم كل سنة ومبتبعتهمش، وبتديهم لبنتي واحد واحد.
كل جواب مكتوب فيه يا حبيبة ماما، النهاردة عيد ميلادك، عندك سنة، يا ترى بتمشي؟ عندك سنتين يا ترى بتتكلمي؟ عندك 5 سنين يا ترى دخلتي المدرسة؟
بنتي قاعدة تقرا وټعيط وتقول انتي كنتي فاكراني كل سنة؟
أمها قالت كل يوم مش كل سنة، كل يوم كنت بصحى أشوف صورتك اللي أبوك كان بيبعتها، وأبوسها وأقول ربنا يحميكي
بنتي بصتلي وقالت ماما، هو انتي زعلانة ان عندي ماما تانية؟
الكلمة وقعت على قلبي، قعدت جنبها ومسكت إيدها وقلت لها يا حبيبتي، أنا عمري ما هزعل ان حد حبك زيادة، انتي محظوظة، في ناس عندها أم واحدة بتحبها، وانتي عندك اتنين بيموتوا فيكي، واحدة جابتك للدنيا واستحملت عشانك، وواحدة ربتك
وكبرتك، والاتنين بيحبوك
حضنتني جامد وقالت انتي ماما اللي ربيتي، وهي ماما اللي تعبت، انا بحبكم انتو الاتنين
الليلة دي أمها الحقيقية باتت عندنا، نيمتها في أوضة الضيوف، بس بنتي مرضيتش تنام غير في حضنها، دخلت نامت جنبها وفضلت ماسكة إيدها.
وأنا وجوزي قاعدين في الصالة مش عارفين ننام، قال لي هتعملي ايه دلوقتي؟ هتقولي للناس؟
قلت له الناس ملهاش دعوة، دي عيلتنا، احنا اللي هنقرر، بس البنت لازم تعرف الحقيقة كلها، ولازم تقضي مع أمها الوقت.
تاني يوم وديتها للدكتور، كشف عليها وقال محتاجة راحة ومتابعة مستمرة.
رجعنا البيت، أمها كانت عارفة، وكانت بتضحك وتقول انا مش زعلانة، انا شوفت بنتي وحضنتها، وده كان كل اللي نفسي فيه
من ساعتها، بقت كل يوم عندنا، بنتي بقت تروح المدرسة الصبح وترجع تجري عليها، تقعد تحكيلها عن صحابها ومدرسينها، وتوريها كراساتها، وأمها بقت تعلمها تعمل الضفيرة اللي كانت بتعملهالها وهي صغيرة، وتعلمها تعمل الكيكة اللي كانت بتحبها.
وأنا؟ بقيت أشوف جوزي بيتغير، التاتو اللي على صدره اللي كان طول عمره مخبيه مني ويلبس تيشيرت مقفول، بقى يسيبه باين، وبقى لما بنتي تشوفه تقول له الله، ماما هنا وتشاور على الوردة البنفسجي.
في مرة بنتي سألت أمها هو بابا وشمك ليه؟
أمها ضحكت وقالت عشان يفضل فاكرني، حتى لما بعدنا، يفضل شايلني فوق قلبه
بنتي قالت طب وانا هتوشميني؟
أمها قالت لا يا حبيبتي، انتي مش محتاجة وشم، انتي محفورة جوا قلبي من غير حبر
قبل فترة، أمها ندهتلي وقالت لي ممكن أطلب منك طلب؟
قلت لها اطلبي
قالت لما أكون مش موجودة، متقوليش لبنتي كلام يزعجها، قولي لها اني في مكان بعيد وبحبها، عايزاها تفتكرني وانا بضحك وبحضنها
قلت لها حاضر، بس انتي هتفضلي معانا
ضحكت وقالت أنا عشت سنين مستنية اللحظة دي، اني أشوف بنتي بتكبر وتبقى عروسة، ربنا اداني أكتر ما استحق، اداني بنت زي القمر وأم تانية ليها زيك، قلبها كبير
وفعلاً بقيت العيلة مترابطة، بنتي نايمة جنبها وبتحلم، وهي في هدوء.
بنتي صحيت في مرة لقتها مرتاحة، جت تجري عليا وقالت ماما، ماما التانية مش بترد
حضنتها وقلت لها هي في مكان حلو أوي، وقالتلي قبل ما تسافر انها بتحبك أوي وهتفضل شايفاكي طول الوقت
بنتي عيطت وقالت طب هترجع امتى؟
قلت لها هترجع كل ما تبصي ورا vدانك في المراية وتشوفي الوردة البنفسجي، هتفتكري انها معاكي
ومن يومها، بنتي بقت كل ما تسرح شعرها، تسيب خصلة ورا ودانها وتبص في المراية وتضحك وتقول صباح الخير يا ماما
وجوزي؟ شال التاتو؟ لا، سابه، بس زود عليه وردة صغيرة تانية جنب الوردة البنفسجي، وردة بيضا، ولما سألته ايه دي قال دي انتي، الوردة البيضا اللي ربت وكبرت واستحملت كدبي وسامحتني
دلوقتي لما حد يشوف صدره ويقول له مين دي؟ بيقول دول عيلتي، بنفسج وابيض، الاتنين ساكنين فوق قلبي
وأنا كل ما أشوف بنتي نايمة وورا ودانها الوردة البنفسجي باينة، بقول الحمد لله انها عرفت الحقيقة، الحمد لله انها عرفت انها مكانتش متسابة، دي كانت متشالة في قلبين، قلب أم اديتها الحياة، وقلب أم تانية اديتها العمر كله.
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”
