وتاني يوم الصبح بعد ما فريدة خلصت كل اللي وراها راحت المكتب عند زينات. فريدة أول ما دخلت المكتب وسلمت على زينات ابتدت تحكي ليها عن أخواتها وأخذت تسترجع معها زكرياتها المؤلمة، وكانت زينات مصدومة من تفكير أخواتها وكان عندها فضول تعرف باقي الحكاية.
زينات: كملي.
وبعد خروج توحيدة قعدت مكاني على السرير شاردة بفكر: هل أنا فعلًا انانية وعايشة دور المثالية ولا لأ؟
وفجأة دخلت علا الأوضة عليا.
علا بدموع التماسيح: لا يا حبيبتي، انت مش انانية، خدي الفلوس كلها، احنا مش عايزين حاجة غير سعادتك، حتى لو حلم مش هيتحقق ولا هنعرف نعمل لماما ولبابا الصدقة الجارية، المهم انتي وحياتك وتقفي جمب خطيبك اللي هو مش عارف قيمتك، بس بصراحة هو معزور، علشان استحمل كتير وانت ضيعتي فرصة السفر من ايديك علشانا، وعلشان احنا مش انانيين، الفلوس دي كلها من نصيبك، بس لما تعملي المشروع معاه ابقى افتكري الجزء بتاع الصدقة الجارية. وقالت كلامها وجاءت تخرج.
فريدة مذهولة من كلام علا، واستغربت أكتر من سماعها كلامها مع توحيدة بالرغم إنها نزلت ادامها: انت هنا من امتى؟ وكمان هي ده التربية إنك تتصنتي على الباب؟
علا بدموع: أنا عملت كده علشان خوفت عليكي وعلى منظرك، وعارفة إنك هتفضلي كاتمة في نفسك زي العادة، بجد حرام عليكي. وكملت بدموع: علشان كده أنا بعد ما نزلت رجعت تاني وفتحت الباب من غير ما تحسوا، وسمعت كلامك وبعد كده استخبيت لحد ما خالتي توحيدة مشيت، ودخلت واتكلمت معاكي علشان كفاية عليكي لحد كده تضحية، علشان احنا مش صغيرين.
فريدة أخدتها في حضنها: ممكن الكلام ده ما يتكررش تاني، وبعدين أنا مش بضحي بسعادتي، دي مشكلة عادية بيني أنا وهو.
علا وهي بتقوم من حضنها: لا، خدي الفلوس اديها له وحددي ميعاد فرحكم. وجاءت تخرج رجعت تاني: بس ممكن تعملي الصدقة الجارية وتحددي الفرح بعد الامتحانات. ومشيت وقفلت الباب وراها وضحكت ضحكة خبيثة، ونزلت لقت علاء مستنياها: انتي كل ده بتعملي إيه؟
علا: كنت بلحق الدنيا قبل ما تخرب.
علاء: دنيا إيه؟ أنا عايز أفهم.
علا: يلا نمشي واحنا في السكة أحكيلك. وفعلًا ومشيوا وحكيت ليه كل حاجة سمعتها وكلامها مع فريدة.
علاء: طب افرضي يا فالحة إنها سمعت كلامك وعملت كده.
علا بضحكة: انت عبيط، انت مش عارفة فريدة عاطفية أد إيه، وكمان وعدها لماما إنها تفضل معانا لبر الأمان. وأنا عرفت ألعب صح على موضوع الصدقة الجارية، ولما سمعت كلامهم فهمت إن خطيبها مش موافق ومش عايز تبعزق الفلوس، فهمت أنا قولت كده ليه؟
علاء: افرضي اخدته واقنعته.
علا: مفتكرش، اللي زيه طماع مش هيقتنع، ولو اقتنع هشوف حاجة تانية. يلا متفقريش وتعاله نلحق المحاضرة.
أما عند فريدة فكرت في كلام أختها وأخدت القرار وقامت تتصل بخطيبها علشان تبلغه بقرارها.
وبعد شوية كانت قاعدة مع خطيبها في مكان.
خطيبها: خير يا فريدة.
فريدة: أنا فكرت وأخدت قرار.
خطيبها بفرحة: قرار؟ أكيد أخدتي القرار الصح اللي فيه مصلحتنا، وأنا بقى هجهز مشروع تمام، وهيكون مكسبه مية في مية، من خلال أرباحه ممكن نكبره ونكبر معه. ياه أنا سعيد بجد إنك أخيرًا عرفتي مصلحتك، واهو أحسن من المرمطة في السفر.
فريدة وقد ارتاحت نفسيًا لأنها أخدت القرار الصح.
خطيبها وهو يحاول يمسك ايديها: حبيبتي، سرحتي في إيه؟
فريدة وهي بتسحب ايديها منه: لا، معاك. بس أنا كنت عايزة أقولك… وخلعت الدبلة من ايديها وسابتها على الترابيزة: أنا فعلًا اخترت صح، والحمد لله إننا لسه على البر، علشان عرفتك على حقيقتك. وسابته ومشيت، ولأول مرة منذ خطوبتها له تحس إنها عملت حاجة كويسة.
رجعت البيت، كانوا أخواتها رجعوا، وكانت علا قلقانة، وأول ما دخلت فريدة.
علا جريت عليها: فريدة، كنتي فين وخرجتي ليه؟
فريدة: كنت بصلح وضع غلط أنا عملته في نفسي.
علاء: وضع إيه؟
فريدة: متشغلوش بالكم، المهم تركزوا في مذاكرتكم والمشروع اللي هتعملوه. وكملت بضحك رغم الوجع اللي حاسة بيه: أصل أنا مش هرمي فلوسي في الأرض.
فرحت علا بكلام فريدة لأنها فهمت إن خططها نجحت، بس مثلت الزعل: ليه يا فريدة؟ ضحيتي بسعادتك ليه؟
فريدة: أبدًا يا حبيبتي، أنا عملت الصح. المهم أنا هدخل أنام شوية، وبعد ما أقوم نتغداء سوا وتكلموني على المشروع.
دخلت فريدة أوضتها تدارى الوجع اللي حست بيه، هي ما حبتهوش، بس كان نفسها ما يحطهاش في الاختيار الصعب، أو كان عندها عشم إنها مهمة بالنسباله.
أما علا فكانت سعيدة بنجاح خططها.
علاء: بجد انتي دماغك ده إيه؟
علا: يا بني أنا فاهمة فريدة أوي، ويلا ندخل نذاكر ونعمل دراسة المشروع.
أما فريدة فبعد كلامها مع خطيبها فضلت إنها تأخذ إجازة لمدة أسبوع حتى لا تضع تحت ضغط من أمل صديقتها وأخت خطيبها. كان خلالها أمل تحاول مكالمة فريدة لكنها لا ترد عليها، كانت عايزة تعرف السبب، بعد ما حاولت مع أخوها لكن رفض أن يقول أي سبب من أسباب الخلاف. وفي إحدى الأيام كانت دينا في مكتب الدكتور ممدوح واستأذنت في الدخول وطلبت منه إنها تسافر مكان فريدة لتحسين ظروفها المعيشية، وهو وافق بس قالها إنه لازم ياخد رأي صحاب المستشفى، ووعدها إنه يذكيها عندهم، وخرجت سعيدة من الوعد ده. وهي خارجة قابلت أمل بصدفة وكانت بتتكلم في التليفون، وأول ما شافتها بعدت التليفون وسلمت عليها ومشيت. أحست دينا إن أمل مخبية حاجة، وخصوصًا بغياب فريدة المفاجئ، فقررت تتسحب تروح وراها علشان تتصنت عليها، سمعتها بتتكلم مع أخوها وبتقول: أنا عايزة أفهم إيه اللي حصل علشان تفسخ الخطوبة معها.
أخوها: …
أمل بعصبية: يعني إيه كل شي قسمة ونصيب؟ أنا حاسة إني فيه حاجة غير كده.
أخوها: …
أمل: ماشي، بتقفل السكة في وشي، ما هي لو فريدة ترد كانت عرفت السبب.
ضحكت دينا إن مخططها نجح، وأخيرًا قدرت تكسر قلب فريدة، وفاضل حاجة واحدة بس وأبقى كسرت فريدة للأبد، بس أعملها ازاي؟ آه خلاص عرفت.
وبعد مرور حوالي أربعة أشهر كانت فريدة تحاول خلالها إنها تهرب من أمل حتى لا تسألها عن أسباب فسخها الخطوبة، وخصوصًا إنها في فترة معينة كانت أمل تحاول معرفة السبب، وفجأة لاحظت هروبها منها لحد هذا اليوم اللي ظهرت فيها دينا وقربت من فريدة وبيديها علبة شكولاتة: صباح الخير يا فيري. وقبلتها.
فريدة باستغراب: صباح الخير يا دينا.
دينا بشماتة: مفيش مبروك؟
فريدة: مبروك بس على إيه؟
جاءت أمل من خلفهم: روحي انتي يا دينا دلوقتي، وسيبيني مع فريدة.
دينا وهي تضع في ايديها علبة الشوكولاتة: مش قبل ما تاخد ده مني يا أمل، وبعدين ما يصحش تكسفي مرات أخوكي كده، وهو فيه حاجات ممكن تكون سر على مرات أخوكي وتكت أوي على كل حروفها.
فريدة واقفة مصدومة مش عارفة تقول إيه.
أمل بغيظ من دينا: خلاص خلصتي؟ اتفضلي بقى.
دينا: سلام، وعقبالك يا فيري.
أمل في داهية. والتفتت لفريدة اللي واقفة مكانها مصدومة من اللي بيحصل: اقعدي يا فريدة وأنا هفهمك.
قعدت مكانها، أمل كملت كلامها: أنا مش عارفة لحد دلوقتي وصلت ليه، ازاي؟ كل اللي أعرفه إن من حوالي أسبوع جاء البيت وفاتح بابا وماما إنه عايز يخطب دينا، ومش بس خطوبة كمان كتب كتاب. ازاي وصلت ليه؟ معرفش، طبعًا أنا وقفت في وشه كتير أوي، بس هو أخد قراره وقال إنه بيبلغنا إن كتب الكتاب يوم الخميس علشان يلحق يخلص أوراقه ويسافر معاها. كملت بدموع: صدقيني أنا معرفش لحد دلوقتي ازاي ده حصل.
أخيرًا فريدة خرجت من صمتها: انتي بتعيطي ليه؟ دلوقتي أنا مش زعلانة، أنا فرحانة، أخوك المرة دي اختار صح أوي.
أمل: أنا زعلانة علشان هو ساعد دينا إنها تكسرك، أنا عارفة إنها مش بتحبك، فعلشان كده عملت. بس أنا نفسي أعرف إيه اللي حصل بينكم.
فريدة: مفيش، وبعدين مين ده اللي يكسرني؟ وكملت بضحكة: ياما دقة على الراس طبول، مش أخوك ودينا اللي هيكسروني، وبعدين أنا وانت هنفضل صحاب. وجاءت مدت ايديها وفتحت الشكولاتة وأخدت حتة وبعد ما دقتها: بس تصدقي جايبة شوكولاتة من النضيفة.
ضحكت أمل على فريدة، فبرغم من صدمتها إلا إنها تحاول التخفيف عنها.
أما دينا بعد ما خرجت ابتسمت بشر لأنها افتكرت إنها كسرت فريدة، وافتكرت ازاي ده حصل. سرحت ازاي قدرت توصل لأخو أمل: بعد ما سمعت مكالمة أمل مع أخوها مشيت بعيد، وكمان خلت واحدة زميلتها تنادي على أمل بأي حجة علشان تخرج، وفعلًا ده حصل، وأول ما خرجت كانت أمل سابت تليفونها في الشاحن، ففتحت التليفون وأخدت الرقم وابتدت تكلمه وتحاول تقرب منه، وخصوصًا لما عرفت نقطة ضعفه إنه طماع زيها، وأغرته بموضوع سفرها وإنها هتقنع الناس هناك وتشوف ليه شغل.
فاقت من شرودها على صوت زميلتها: سرحانة في إيه كده؟
دينا: ولا حاجة، أنا جاية أسلم عليكم قبل السفر.
وهنا اتقفلت صفحة أخرى في حياة فريدة بحلوها ومرها، لتستقبل فريدة مرحلة أخرى في حياتها هتكون الفيصل وهتغير حياتها نهائيًا.
