ميرهان قربت من المكتب بخطوات مرتجفة ورمت شنطتها على الكرسي اللي قدامه وقعدت وهي بتمسح دمعة نازلة: “أنا جيتلك عشان مكنتش عارفة أروح فين. مش عارفة أتكلم مع مين. أهلي بيصرخوا عليا، والصحافة قدام البيت، وأنا… أنا محتاجة إنك تسمعني. بس تسمعني.”
رائف سند إيديه على المكتب وقال بهدوء غريب: “اتفضلي. أنا سامعك.”
الهدوء ده فاجأها. كانت متوقعة صراخ، كانت متحضرة للعتاب والخناقة، وكانت متأكدة إنها قادرة تلعب على أوتاره زي كل مرة. فبصت له لحظة وبعدين انهارت في البكاء بشكل درامي: “اللي حصل ده كله مؤامرة يا رائف! مؤامرة علينا إحنا الاتنين! أنا ما كنتش في وعيي. أحمد الصياد حط لي حاجة في العصير، أنا مش فاكرة حاجة من اللي حصلت بعد أول كاس. أنا صحيت لقيتك واقف قدامي وبتضرب فيه، ومش فاهمة أنا فين ولا ليه!”
رائف ما ردش.
عيونه كانت بتبص فعلاً ناحيتها، لكن مش عليها. كانت متثبتة على الشاشة الصغيرة اللي في ركن المكتب، شاشة الكاميرات اللي نسي يقفلها، وكانت لسه مفتوحة على قسم الأرشيف. شاف حنين قاعدة على مكتبها بتكتب حاجة بتركيز، وعلى خدها لسه أثر خفيف من الاحمرار، وكل شوية ترفع إيديها وتلمس خدها وتبتسم لنفسها ابتسامة صغيرة وتنزل عينيها بسرعة كأن حد ممكن يشوفها.
ميرهان كملت بصوت أعلى وأكتر درامية: “أنا بحبك يا رائف! أنا عمري ما حبيت حد غيرك! كل اللي حصل غلطة، غلطة ما تستاهلش تهدم اللي بينا. إحنا بقالنا سنتين مع بعض، سنتين! إزاي تنسى كل ده في ليلة واحدة؟”
