ا شوشو فقامت مخضوضة: فريدة، انت تعبانة؟
فريدة من بين الشهقات: آه كويسة، بس صعبانة عليا أخواتي، ازاي يفكروا فيا كده؟
شوشو وهي بتطبطب عليها: اهدي، وصدقيني بكرة هيعرفوا الحقيقة، وساعتها هيندموا.
دخل مراد، شاف فريدة: جرى عليها، في إيه؟ بتعيطي ليه؟
شوشو: مفيش، هي واضح إنها أول ما شافتني اتفجعت. وكملت بطريقة الأطفال: هو أنا شكلي منكوش ولا حاجة؟
فريدة ابتسمت من بين شهقاتها: لا يا حبيبتي، انت زي القمر.
شوشو: عمومًا أنا هروح أخليهم يجهزوا الفطار. وشاورت بصوابعها بمعنى تحذير: أنا راجعة على الطول.
قرب مراد من فريدة وبدأ يمسح دموعها.
شوشو دخلت فجأة: أوبا، هو أنا مش قلت راجعة؟
مراد بنرفزة: نعم يا شوشو؟
شوشو بضحكة: كنت بسأل هتفطروا هنا ولا في الجنينه؟
كل ده وفريدة بتكتم ضحكاتها.
شوشو: طيب.
خرجت شوشو، وقرب مراد تاني من فريدة: حبيبتي، مش عايز أشوف دموعك تاني.
دخلت شوشو تاني وهي بتحاول تداري ضحكتها: بابا، أنا… وقبل ما تكمل كلامها كان مراد حدفها بالوسادة.
فريدة وهي بتحاول تقوم من مكانها: أنا أروح أغير هدومي علشان نفطر، أحسن شوشو مش هتسكت.
شوشو فتحت الباب ودخلت رأسها: صح يا دادي؟
خرجوا كلهم يفطروا في الجنينه في جو كله سعادة وضحك ومشاغبة شوشو ليهم. وبعد شوية انضم ليهم أسر وحسن وحنان بعد ما عرفوا بتعب فريدة علشان يطمنوا عليها.
حنان كانت ملاحظة نظرات أسر لشوشو، وكانت فرحانة من جواها، وكمان نظرات فريدة ومراد ومتابعة شوشو ليهم.
استأذن حسن ومراد وأسر علشان يدخلوا المكتب يرجعوا أوراق خاصة بشغل.
وفريدة هي كمان استأذنت تدخل تاخد الدواء، لأنها حست إن حنان محتاجة تتكلم مع شوشو.
فعلًا أول ما دخلت فريدة، لفت حنان لشوشو: حاسة إنك اتغيرت كتير.
شوشو ابتسمت لأنها فهمت هي تقصد إيه: قصدك علشان فريدة وبابا؟
حنان: آه.
شوشو: أبدًا، بس كل ما أشوف نظرة السعادة في عينيه أبقى سعيدة. أنا بحب بابا أوي، واطمني هو ما اتغيرش معايا.
حنان: لا، أنا واثقة إن حبه ليكي أقوى من أي حاجة تانية.
شوشو: حضرتك كنتي تعرفي ماما الله يرحمها؟ كلميني عنها. بابا كان بيحبها؟
حنان ابتسمت بسمة حزن عند ذكر شوشو لوالدتها: عارفة يا شوشو إنك فيكي شبه كتير أوي، مش في الملامح لا، في الروح كمان. كانت زيك كده مرحة وبتحب الحياة، والأهم إنها كانت بتحب السعادة لكل اللي حواليها. أما علاقتها بباباكي كانت علاقة ناجحة، وبس يا خسارة كانت قصيرة أوي.
شوشو: طب حضرتك كنتي فين كل السنين اللي فاتت؟
حنان: تقدري تقولي إني كنت فاهمة أمور غلط، هي السبب في بعدنا. وحاولت تغير الحوار: وبعدين انتي شقية أوي، انتي محسساني إني قاعدة ادام وكيل نيابة.
شوشو ضحكت: ماشي، براحتك، اهربي.
حنان: مش بقول شقية؟ أنا بقى اللي عايزة أسألك: انت بتحبي أسر؟
شوشو برقت من السؤال واتكسفت.
حنان: أنا واثقة فيه إن أسر بيحبك، وعارفة إنك انت كمان بتحبيه. ياريت ما تضيعوش عمركم في العند، عيشوا حياتكم.
شوشو اتكسفت ووشها احمر: عن إذنك، هدخل أطمن على فريدة.
عدى يومين، وكانت فريدة قدرت تتعافى من صدمة أخواتها.
وفي يوم، فريدة ومراد وهما سهرانين في الجنينه.
مراد: تعرفي يا فريدة إني بغير عليكي من خطيبك؟
فريدة بصتله بدهشة.
مراد: ما تبصليش كده. آه بغير إن في واحد قبلي مسك إيديك أو قالك كلمة حلوة وكنتي بتحلمي معه بحياة وأسرة.
فريدة: لدرجة دي؟
مراد: وأكتر.
فريدة: هتصدقني لو قلتلك إن أول مرة أعيش معاك الإحساس بالحب ده؟ مراد، أنا بحبك انت.
مراد بسعادة ورفع ايديها وباسها: أنا مش بحبك، أنا بعشقك.
فريدة اتكسفت وحطت وشها في الأرض.
مراد رفع وشها: لا، خالي الكسوف لبكره.
فريدة: اشمعنا بكره؟
مراد وهو قام واقف: كلها بكره.
عدى الليل سريعًا وجاء النهار سريعًا مليء بالمفاجآت، منها السارة ومنها غير السارة.
خبطت شوشو على أوضة فريدة: ادخل.
شوشو: صباح الورد.
فريدة: صباح الورد والياسمين عليكي. تعالى.
شوشو: تعالى إيه بس؟ ده احنا ورانا مشاوير كتير أوي النهاردة.
فريدة: مشاوير إيه بس؟
شوشو وهي بتشد إيد فريدة: يلا، وبابا يعرفك بره، أحسن أسر من بدري مستني.
خرجوا سوا، مراد أول ما شافهم فرح، أهم اتنين عنده خلاص بقوا قريبين من بعض، وفضل يبص على فريدة كتير.
شوشو لاحظت ده: طب عن إذنكم، أنا، وياريت نخلص علشان نلحق.
فريدة وهي بتبص لمراد: ممكن أفهم إيه الموضوع؟
مراد: ببساطة كده، أنا قررت إننا نتجوز النهاردة.
فريدة بدهشة: نتجوز ازاي؟
مراد: ازاي دي بتعتي أنا. وغمز بعينيه.
فريدة اتكسفت من تلميح مراد: أنا بتكلم بجد.
مراد شدها من ايديها: تعالى أفهمك. بس يا ستي، انتي كنتي بتأجلي علشان خاطر شوشو، وخلاص دلوقتي اتحلت. وبعدين أنا مش قادر على بعدك، وكمان علشان أخواتك دول أعرف أجيب حقك منهم.
شوشو: لا يا مراد، أخواتي معزورين، أرجوك.
مراد: لسه بعد ده كله؟
شوشو: أخواتي.
مراد: طب خلاص، يبقى توافقي على طلبي.
فريدة: بس…
مراد: من غير بس، وافقي، انتي كل حاجة هتبقى تمام.
فريدة هزت راسها بالموافقة.
مراد لسه هيقرب، جاءت شوشو: أوبا، دائمًا باجي في الأوقات الغلط.
مراد: فعلًا يا شوشو. مش هوصيكي.
شوشو: كله تحت السيطرة.
خرجت شوشو وفريدة، واتجهوا ناحية المول لمحل معين، مراد مكلمه ومتفق معه. وأول ما دخلوا شوشو عرفتهم بنفسها.
البائعة في المحل: أهلًا. أخدتهم على البروفة.
فريدة: إيه ده؟ هي جابتنا هنا ليه؟
شوشو: اهدي كده، كله هيبقى تمام.
بعد شوية دخلت البنت ومعاها فستان فضي شيك جدًا: اتفضلي.
فريدة: إيه ده؟
البنت: ده الفستان اللي مراد بيه اختاره، وأعتقد إنه هيكون مظبوط.
شوشو وهي بتمسك الفستان: واو، ذوقه حلو أوي. مش كده يا فريدة؟
فريدة منبهرة: عندك حق.
