— “سمعت؟ البنت اختارت.. والمرة دي مفيش صلح أثر. المرة دي اللي هيقرب من حدود داري، هاكله بسناني. خد رجالتك وارجع، وقول لأبوك “صبا” مابقتش للبيع ولا للإيجار.. صبا هي “القلب” اللي بيحرك مصعب الهواري.”
سلطان عرف إن المواجهة خسرانة، مش عشان الأداة، عشان “روح” صبا اللي بقت ملك لمصعب. ركب خيله ومشي هو ورجالته والغل بياكل قلوبهم.
مصعب لف لصبا، مسك وشها بين إيديه الخشنة، وهز راسه بذهول:
— “ليه عملتي كده يا صبا؟ كان ممكن ترجعي لاهلك وتخلصي من قسوتي.”
صبا ابتسمت بدموع وقالت له:
— “عشان قسوتك دي يا مصعب، هي اللي خلتني أعرف إنك أكتر راجل بيعرف يحب في الدنيا.. بس كنت محتاج “بنت” تطلع الحب ده من تحت الصخر.”
مصعب سحبها لحضنه قدام النجع كله، وهو بيهمى في ودنها:
— “من اليوم يا صبا.. مفيش كلمة تمشي في الدار دي غير كلمتك، ومفيش حد يخوفني في الدنيا دي غير “زعلك”.”
النجع كله بات ليلته يتحدث عن “زلزال” الهواري.. إزاي “الغول” اللي مابيلينش، وقف يحامي لمراته قدام أهلها، وإزاي البنت اللي دخلت بكسرة نفس، بقت هي “الآمرة الناهية” في حياته.
دخل مصعب وصبا الدار، والسكوت كان سيد المكان، بس المرة دي مكنش سكوت خوف، كان سكوت “هيبة”. مصعب قفل الباب الكبير وراه، ولف لصبا اللي كانت لسه واقفه وشها منور بنور النصر، بس عيونها مليانة تعب.
قرب منها بخطوات بطيئة، سحب “الشال” من على كتافه ورماه بإهمال، وبص لها نظرة طويلة خلت قلبها يدق بعنف. مد إيده ولمس طرف طرحتها، وهمس بصوت فيه “بحة” شوق مكتوم بقاله سنين:
— “قولتي لأخوكي إني صنت كرامتك.. وإني بقيت سندك. أنتي كنتي بتقولي كدة عشان تمشيه، ولا ده كلام طالع من جوه يا صبا؟”
صبا خدت نفس طويل، وقربت منه لحد ما بقت المسافة بينهم معدومة، رفعت إيدها ولمست ذقنه الخشنة وقالت بصدق هز كيانه:
— “أنا مابقولش كلام عشان أمشي حد يا مصعب. أنا صبا المحمدي، والكلمة عندي ميزان. أنت قسيت عليا.. أيوه. وحاولت تكسرني.. كتير. بس في عز قسوتك، كنت بشوف في عينك “خوف” عليا أكتر من خوفي على نفسي. والست مالهاش غير الراجل اللي يخاف عليها حتى من نفسه.”
مصعب قبض على إيدها اللي على وشه، وباس كفها ببطء، وكأنه بيعتذر عن كل لحظة وجع سببهالها:
— “أنا متربي وسط ديابة يا صبا.. القسوة كانت درعي. بس أنتي جيتي وكسرتي الدرع ده، ودخلتي في حتة مفيش مخلوق داسها قبلك. أنا دلوقت “تايه”.. مابقتش عارف أكون الغول اللي الناس بتخاف منه، ولا أكون الراجل اللي “بيترعش” من نظرة عينك.”
صبا ابتسمت بجمالها الهادي وقالت له:
— “خليك الاتنين.. غول على اللي يعاديك، وراجل حنين في حضن مراته. هي دي الهيبة الحقيقية.”
في اللحظة دي، مصعب شالها فجأة بين إيديه، صبا شهقت بخضة وحوطت رقبته بإيدها. ضحك مصعب لأول مرة من قلبه، ضحكة خلت الحيطان نفسها تستغرب:
— “دلوقت بقى.. مفيش صلح أثر، ومفيش مطاريد، ومفيش أهل. دلوقت مفيش غير “مصعب وصبا” وبس. وعايز أشوف بقى، “الست اللي بتخوفني” دي، هتعرف تخوفني وأنا قافل علينا الباب ده؟”
صبا دفنت راسها في صدره وهي بتهمس بدلال:
— “الخوف مش بالصوت العالي يا ابن الهواري.. الخوف في إنك ماتقدرش تغيب عن عيني لحظة واحدة، وده اللي هيحصل.”
طلع بيها الجناح، ومن الليلة دي، نجع الهوارة مابقاش يسمع صوت زعيق مصعب، بقى يسمع صوت “المواويل” اللي بتغنيها صبا، ويشوف “الغول” وهو ماشي في وسط الناس، وعينه دايمًا بتدور على شباك واحد بس.. الشباك اللي فيه “روحه”.
مرت سنة كاملة على نجع الهوارة، سنة اتغيرت فيها ملامح النجع زي ما اتغيرت ملامح “مصعب”. الجبروت اللي كان بيهز الأرض، بقى يلين تحت يد “صبا”، والبيت اللي كان صمت وقسوة، بقى فيه حياة بتدب في كل ركن.
في جناحهم الواسع، كانت الشمس لسه بتبدأ تشق طريقها من ورا الستاير الحرير اللي صبا اختارتها. مصعب كان واقف قدام المراية، بيلف شاله بإتقان، بس عينه كانت مراقبة السرير من خلال المراية بابتسامة مخفية.
صبا كانت نايمة، وفي حضنها حتة من قلب مصعب.. “يحيى”. عيل صغير مكملش شهرين، بس واخد سماره، وعروق جبهته، وحتى القفلة بتاعة إيده اللي بتدل إنه طالع “هواري” أصيل.
مصعب قرب من السرير ببطء، خطواته اللي كانت بترج البيت بقت دلوقت حذرة كأنه بيمشي على قشر بيض. وطى وباس راس صبا بحنية، وبعدين باس يد ابنه الصغيرة.
صبا فتحت عينها بهدوء، وابتسمت أول ما شافته:
— “صحينا يا بو يحيى؟ كل ده وقوف بتتأمل فينا؟”
مصعب قعد على طرف السرير، وسحب إيدها باسها:
— “بتأمل في الرزق يا صبا.. السنين اللي فاتت كوم، والسنة اللي عشتها معاكي دي كوم تاني. كنت فاكر إن هيبتي في الخوف، طلعت هيبتي في إن الكل يشوفني وأنا ماشي جنبك وراسي مرفوعة بيكي.”
صبا قامت نص قاعدة، وعدلت يحيى في حضنها:
— “الناس بره بتقول إن “الغول” بقى بيمشي يضحك في السوق، وإن صبا المحمدي سحرت لولد الهواري.”
مصعب ضحك ضحكة رجولية واثقة:
— “وقوليلهم السحر ده هو اللي خلى الزرع يطرح، والأثر يبرد. النهاردة سلطان أخوكي جاي على الغدا.. وعاوزك تجهزي “الوليمة” اللي تليق بـ خالي ولدي.”
صبا استغربت ورفعت حاجبها:
— “سلطان؟ أنت اللي عزمته يا مصعب؟”
مصعب قام وقف بكل شموخ، ولبس عبايته:
— “أيوه.. اللي يصون عرضي، أصون أهله. والصلح اللي بدأ بأثر، النهاردة بيثبت بـ “يحيى”. أنا مش عاوز ولدي يكبر وفي قلبه غل من حد، عاوزه يطلع زي أمه.. قوي بس قلبه أبيض.”
صبا قامت ووقفت وراه، لفت إيدها حوالين خصره وسندت راسها على ظهره العريض:
— “تعرف يا مصعب.. أنا كنت بخاف منك أول ليلة دخلت فيها الدار دي، دلوقت بقيت بخاف “عليك” من نسمة الهواء. أنت بقيت الوحيد اللي يقدر يخليني أضعف، والوحيد اللي يخليني أهد الدنيا لو حد لمسه.”
لف مصعب وحضنها هي وابنه بقوة، وغمض عينه وهو بيستنشق ريحتها اللي بقت هي “الأمان” بالنسبة له:
— “وأنا يا صبا، بقيت الوحيد اللي “يخاف” من ست.. بس الخوف ده هو اللي خلاني راجل بجد.”
نزل مصعب للديوان، وصوت خطواته كان فيه نغمة جديدة.. نغمة راجل شبع حب، وست عرفت تروض الوحش بكرامتها وهدوئها. وانتهت قصة “مصعب وصبا” بإن الأثر مابقاش يغسل الأثر، لكن “الحب” هو اللي بيغسل القلوب وبيبني البيوت.
بعد سنتين من ذلك اليوم، كان نجع الهوارة قد شهد تحولاً لم يتوقعه أحد. مصعب الهواري، الذي كان يُعرف بقلبه المتحجر وعصاه التي لا ترحم، أصبح الرجل الذي يجلس في ديوانه ليستمع لشكاوى أهل النجع ويحلها بالعدل لا بالقوة. صبا، التي دخلت داره “أسيرة” كما أراد، أصبحت المرأة التي يستشيرها في كل أمر، ليس لأنها زوجته فقط، بل لأنها العقل الذي يرى ما لا يراه الآخرون.
في صباح أحد الأيام، كان يحيى قد بدأ يمشي متعثراً في جنينة الدار، وصبا تجري خلفه وهو يضحك ببراءة الأطفال. مصعب كان واقفاً عند الباب يراقبهما، وابتسامة لا تفارق وجهه. اقترب من صبا ووضع يده على كتفها، وقال بصوت هادئ لم يعهده أحد من قبل: “تعرفي يا صبا، أنا كنت فاكر إن القوة في إنك تخلي الناس تخاف منك. أنتِ علمتيني إن القوة الحقيقية في إنك تخلي الناس تحبك وتحترمك من غير ما تخاف منك.”
صبا التفتت إليه، ويحيى يتعلق بثوبها، وقالت بابتسامة: “وأنا كنت فاكرة إني هدخل هنا وأنا مكسورة. أنت علمتني إن الكرامة مش في إنك متتكسريش، لكن في إنك تعرفي تقفي تاني بعد ما تتكسري.” مد مصعب يده ومسح دمعة صغيرة كانت قد تسللت إلى عينها، وقال: “أنا اللي اتعلمت منك، مش العكس. كل حاجة حلوة في حياتي دلوقتي، أنتِ سببها.”
مرت الأيام، وكبر يحيى، وأصبح الطفل الذي يملأ الدار ضحكاً وحيوية. وكان مصعب كلما جاءه ضيف، يقول له بفخر: “ده ابني يحيى، طالع لأمه في الذكاء والقوة، ولأبوه في الشموخ.” أما صبا، فقد أصبحت السيدة الأولى في النجع، ليس بالاسم فقط، بل بالفعل. كانت تحل مشاكل النساء، وتساعد المحتاجين، وتقف بجانب مصعب في كل قرار، حتى أصبحت شريكته الحقيقية في كل شيء.
وفي ليلة من الليالي، بينما كانا جالسين في شرفة الجناح، والقمر ينير النجع كله، قال مصعب وهو ينظر إلى صبا: “أنا كنت فاكر إن أحلى حاجة ممكن تحصل لي هي إني أنتقم من اللي آذوا أخويا. بس دلوقتي عرفت إن أحلى حاجة هي إنك تكون جنبي، وإني أشوف يحيى بيكبر، وإننا نبني حاجة حلوة من مكان كان كله أثر ووجع.” صبا سندت رأسها على كتفه، وقالت: “وأنا كنت فاكرة إني هعيش عمري كله أدفع تمن حاجة
