
إزاى مش مهم؟ دى صوابع ومعلمة ع ايدك، قولى مين عمل كده.
نظرت حور في عينيه بشجاعة:
ولو قلتلك، تفتكر هتصدقنى؟
رحيم بحيرة من ردها:
تقصدى ايه؟ حور، مش مهم أقصد ايه، انت امبارح قررت أي جهة هتصدقها، فمبقاش ليه لازمة الكلام.
بهتت ملامح رحيم ليقول بعدم تصديق:
تقصدى سارة بكلامك ده؟ وانها اللى عملت فيكى كده؟
هازان بشجاعة رغم نبرة عدم تصديقه التي سمعتها في صوته:
أه هى، عاوز تصدق صدق، مش عاوز عادى، مش هتبقى أول مرة.
ليترك رحيم ذراعها ويمرر يده في شعره بعصبية ليعطيها ظهره ويقول بنبرة لا تظهر أي ردة فعل:
البسى هدومك وحصلينى تحت، أدامك عشرة دقايق.
لينتفض ويخرج من الغرفة بخطوات سريعة ليصفع الباب بقوة اهتزت لها أركان الغرفة، فتهز حور كتفيها تحاول كبت دموعها حتى لا تتساقط، لتحدث نفسها:
وانتى زعلانة ليه دلوقتي؟ ما انتى عارفة رد فعله من قبل ما تقوليله، وعارفة قيمتك عنده، يبقى ليه الدموع؟
نزلت حور الدرج تشعر بالخجل والرهبة، ترتدي فستانًا بسيطًا من اللون الأزرق ووشاحًا خفيفًا تخفي به خصلات شعرها التي تمردت من أسفله لتغطي وجنتيها، وأخذت تنظر حولها بحيرة لتجد إحدى الخادمات تظهر من جهة المطبخ لتسألها حور بهدوء:
فين رحيم بيه؟
ردت الخادمة بهدوء:
في أوضة السفرة يا هانم.
شكرتها حور بخفوت وهي تتجه إلى الحجرة التي ما أن دخلتها حتى أسرعت السيدة وداد بالترحيب بها بمحبة:
صباح الخير يا بنتى، تعالى اقعدى هنا.
تقدمت حور لتجلس بجوارها تحاول أن لا تلتفت ناحية رحيم الذي كان يجلس على رأس المائدة بجواره سارة التي كانت تهمس إليه بخفوت ودلال، ورحيم ينظر أمامه بتصلب وهو يتناول طعامه، يبدو عليه الضيق، نظرت حور إلى زوجة حمزة التي كانت تجلس أمامها تبتسم لها فردت إليها بسمتها وهي تخفض رأسها بخجل تتناول طعامها.
انتبهت حور على صوت السيدة وداد تقول:
عاملة ايه يا حبيبتى النهاردة؟ شوفى يا حور، أنا عوزاكى تعتبرى الكل هنا اهلك، ولو عاوزة أي حاجة متتكسفيش.
ردت حور وهي تنظر باتجاه رحيم تراه يتناول طعامه بلامبالاة بما يدور من حديث لتخفض رأسها وتقول:
شكرًا يا خالتى، متحرمش منك.
لتدوي ضحكة عالية ساخرة من سارة:
خالتك؟ اى خالتك دى؟ انتى لسه فاكرة نفسك في بيتكم، وايه اللى انتى لابسة ده؟ ده لبس يليق ع مشوار للغيط مش قصر الشرقاوى.
تابعت سارة ضحكتها الساخرة ليدوي صوت رحيم الرجولي بغضب عاصف:
سارة، الزمى حدودك، وانتى بتتكلمى واعرفى بتقولى ايه.
شحب وجه سارة وهي ترى غضب رحيم فتظاهرت بالأسف وهي تقول في محاولة منها لتهدئة غضبه:
أنا مقصدش يا رحيم، أنا بس كنت بحاول ألفت انتباهها ان وضعها هنا غير ما كان في بيت أهلها.
أحست حور برغبة في البكاء فرغبت في النهوض قبل أن تتساقط دموعها فيزداد ذلها أمامهم، لتنهض سريعًا بخطوات عاصفة، ولكن يد رحيم امتدت إليها تمسك بيدها عندما مرت من جواره ليسألها بصوت هادئ:
رايحة فين؟ اقعدى كملى فطارك.




